Akissarsiat amerlanerusut Kommune Kujallermit piumasarineqartut
Akissarsiat amerlanerit, illunik pitsaasunik najugaqarfissaqartitsisinnaaneq, bonusisiassat suliffigisamiluunniit akissaatinut tapisiaqartarneq neqeroorutigineqarsinnaagunik kujataani atorfinitsitsisoqarnerusinnaassasoq, Kommune Kujallermi isumaqartoqarpoq.
Taamaammat kommuni aningaasaqarnermut naalakkersuisoqarfimmut saaffiginnittoq, Kommune Kujallermi borgmesterip sinniisuata, Simon Simonsenip oqaatigaa.
- Soorlu misilittagaqarfigigipput ilinniartitsisut siornatigut imatut aaqqiissuteqarfigineqarnikuupput, avinngarusimasuni ilinniartitsisuussagunik assigiinngitsunik ajunngitsorsiassaqartitaasarnikuullutik, aammalu aningaasarsiatigut ajunngitsumik inissisimasarlutik. Taamatukanneq ittumik kajumissaammik atorfinnut pineqartunut inuttassarsiuinermi periarfissinneqarsinnaaneq ujartorparput, Simon Simonsen oqarpoq.
Aamma atuaruk Isumaginninnikkut siunnersortit utaqqisinnaanngikkaat
Kommunimmi isumaqatigiissutigineqareertunit akissarsititsineroqqusaanngillat.
- Tassani aallaaviunerpaavoq, kommunit tamattaalluta namminneerluta immikkut ataasiakkaarluta aningaasarsianik inissitsiterinissamut allanillu ajunngitsorsiassanut atorfinnut ataasiakkaanut pineqartunut inatsisitigut periarfissaqartitaannginnatta, Simon Simonsen oqarpoq.
Aamma atuaruk Kommune Kujalleq isumaginninnermi pisortaqaleqqittoq
Angerlarsimaffissat pilerinarnerusut
Amerlanernillu akissarsiaqartitsinerup saniatigut sulisunut najugaqarfissat pitsaanerusut, bonisisiassat soraarnermi tigusassat, Nuullu avataani sulinermi akissaatinut tapisiat aamma periarfissaasinnaasut, Simon Simonsenip oqaatigaa.
Kommunelu aningaasaqarnermut naalakkersuisoqarfimmut ilaatigut allappoq, inatsisitigut isumannaatsuunerup patajaallisarnissaa politikkikkut anguniagaasoq. Taannalu eqquutsinneqassappat akissarsiaqartitsinermi malittarisassat atorfinitsitsiniarnermilu periarfissat pitsaanerulersinneqartariaqarput, illoqarfiit Nuup avataaniittut illoqarfiit pingaarnersaannut atorfinitsitsinissamut unammillersinnaaniassammata.
Aamma atuaruk Meeqqat pillugit immikkut illuinnartumik iliuuseqartoqartariaqartoq
Simon Simonsenilli akissarsiat qanoq amerlanerulersinneqarnissaat suli oqaatigisinnaanngilaa.
- Maannamut oqaatigisinnaanngikkallarpara. Oqallisigineqartut sukumiinerusumik suli iserfigisimanngilakka, taamaammallu annertunerusumik suli oqaaseqarfigisinnaanngilakka, Simon Simonsen oqarpoq.
Sulilersitsinissamulli ajornartorsiutit iliuuseqarfigineqarnissaat, Kommune Kujallermit neriuutigineqarpoq.
- Soorunami neriuutigieqaarput. Naalakkersuisut ajornartorsiutinut aaqqiissuteqarnissaminnut upernaaq aasaqqaarneranilu oqariartuuteqartaqattaarnerat aallaavigalugu saaffiginnissutitsinnut ammasumik aaqqiissuteqarusunnermillu peqarlutik tigusissasut, Kommune Kujallermi borgmesterip sinniisua, Simon Simonsen oqarpoq.