Politikki

Meeqqat pillugit immikkut illuinnartumik iliuuseqartoqartariaqartoq

Meeqqat pillugit isumaginninnikkut suliarpassuit 'sumiginnaanerujussuarlu' eqqarsaatigalugit Naalakkersuisut immikkut illuinnartumik iliuuseqartariaqartut Demokraatit isumaqarput.

Det har kostet ca. 200.000 kr. at etablere legepladsen.

Allattoq Charlotte Holten-Møller

juunip 20-at 2016 09:32

Nutserisoq Bibi Nathansen

Paragraf 37 atorlugu apeqquteqarnermini partiip Ilaqutariinnermut peqqissutsimullu tunngasuni oqaaseqartartuata, Tillie Martinussenip, Tasiilami meeqqat pillugit isumaginninnikkut suliat 520-iusut Suliassaqarfinnik Nakkutilliisut nalunaarusiaanni saqqummersimasut innersuussutigaa.

Kommuni Kujallermi isumaginninnermi suliassat 1100-t innersuussutigaattaaq.
Avannaani pissutsit, Meeqqat Illersuisuata nalunaarusiamini aarlerinartutut oqaatigisai, aamma innersuussutigai.

Aamma atuaruk Aviâja E. Lynge: Meeqqat pisinnaatitaaffii unioqqutinneqarput

- Nunatsinni, pingaartumik, meeqqat inuusuttullu pillugit isumaginninnikkut suliat amerlavallaaqaat. Tamannalu kommunit Namminersorlutillu Oqartussat piffisami sivisuumi malinnaasinnaasimannginnerannik takutitsivoq.

- Sulisut pisinnaasartik tamaat sulipput, taamaammat politikkikkut sulinitsinni pilersaarusiornitsinnilu kukkuluttorsimavugut, Tillie Martinussen KNR-imut oqarpoq.

Immikkut illuinnartumik iliuuseqarneq tassaasinnaavoq nunatta karsianit amerlanerusunik aningaasaliilluni ornittakkanik amerlanerusunik pilersitsineq imaluunniit isumaginninnerup iluani meeqqanik sullissisunut ikorfartuilluni aqqutissiuineq, sulisunulluunniit immikkut ajornakusoortunik suliaqartunut tapisiaqartitsineq.

Isumaginninnermilu siunnersortit tamakkununngalu Ilinniartitsisut Qallunaat Nunaanniit tikisinneqartartut amerlineqarsinnaapputtaaq, soorlu eqqartuussivinni suliassat amerliartuinnarsimasut naammassiniarlugit inatsisilerituunik tikisitsiartugut.

- Naapertuutsillugu ajunngitsumillu siunertaqartillugu, Qallunaat Nunaat ikiuukkumagaangat ikiuukkumanerat qujarutigissagipput isumaqarpunga.

- Isumaginninnikkut suliat pillugut ukiunut qulinut tulliuttunut aningaasalersuinissamut pilersaarusiortariaqarpugut. Nunatsinni maannakkut ajornartoorfimmiittugut, isumaqarpunga, Tillie Martinussen oqarpoq.

Isumaginninnermut suliat akiorniarneqassappata qanoq akeqassanersoq Ilaqutariinnermut, Isumaginninnermut, inatsisinillu Atuutsitsinermut Naalakkersuisumit, Martha Lund Olsenimit, Tillie Martinussenip paaserusuppaa.