Aviâja E. Lynge: Meeqqat pisinnaatitaaffii unioqqutinneqarput
Aviâja Egede Lyngip meeqqat illersuisuattut meeqqat pisinnaatitaaffii unioqqutinneqannginnissaat isumannaartussaavaa, Tasiilamilu pissutsit pisinnaatitaaffinnik unioqqutitsisuusutut oqaatigai.
- Uanilu ajoraluartumik ajuusaarnaqisumillu meeqqat illersorneqarnissamut ikiorneqarnissamullu pisinnaatitaaffii malinneqanngitsutut taaneqarsinnaapput, Aviaja Egede Lynge KNR-imut oqarpoq.
Ajornartorsiutit itinerusumik misissorneqartariaqartut siunissarlu ungasinnerusoq eqqarsaatigalugu pilersaarusiortoqartariaqartoq, taanna isumaqarpoq.
- Aatsaat pisoqareeraangat aaqqiiniarneq aallaaviginagu kisiannili tamakkiinersumik inuuniarnermi ukua atugassarititaasut aamma qiviarniarneqarnissaat aamma kissaatigineqarpoq. Soorlu assersuutigalugu suliffissaqarneq, atornerluisunut katsorsaaneq, ilinniartitaaneq ineqarniarnerlu ilaalu ilanngullugit, meeqqat illersuisuat oqarpoq.
Aamma atuaruk Tasiilami isumaginninnermi suliat 520-it
Isumaginnittut ilinniaqqinnikkut ikiorsorneqarnerusariaqartut Aviâja Egede Lynge isumaqarpoq.
- Allarpassuarnik aamma tigummisaqartarput, meeqqanut tunngasuinnaanngitsunik, taamaammat sagsbehandlerit aamma pikkorissarneqarlutik ilinniaqqitsinneqarlutillu meeqqanik sullissinermi tunngasunik aamma annertunerusumik tapersersorneqarnerunissaat taakku aamma soorunami kissaatiginaqaaq, Aviaja Egede Lynge oqarpoq.
Meeqqanut illersorsuisoq massakkorpiaq Tasiilamiippoq, angalanerminilu Kuummiut aamma tikissallugu. Angalaneq aappaagumut aatsaat pilersaarutigineqarrnikuugaluarpoq, Tasiilamili nunaqarfittaanilu paasissat pissutigalugit angalanissap siuartinneqarnissaa MIO-mit aaljangerneqartoq, Aviaja Egede Lynge KNR-imut paasissutissiivoq.
