Kommunit kujataamioqatigiit Narsami isumasioqatigiilerput

novembarip 24-at 2006 10:41

Nunatsinni kommunit 2009-mi kattunnissaat sioqqullugu, kommunini Kujatamioqatigiinni suleqatigiissutissatik oqaluuserisussanngorpaat

Nanortallip, Qaqortup Narsallu Kommuniisa nalunaaqutaq marluniit Narsami isumasioqatigiinnerat aallartissaaq.

Kommunini taakkunani pingasuni, immikkoortortaqarfiit ataasiakkaarlutik akisussaaffii, aamma siunissami akisussaaffiit suut, Namminersornerullutik Oqartussat kommuninut nuunnialersaarneraat oqaluuserineqassapput.

Ukiup affaata ingerlanerani kommunini pineqartuni ataatsimiititaliat ataatsimoorlutik naapittarsimapput, taakkualu naalisagaat ullumi saqqummiunneqassapput. Assersuutigalugu Kultureqarnermi immikkoortortaqarfiit allaffissornikkut aqutsisarnerat assigiinngeqisoq saqqummiunneqassaaq. Tassani pineqarput atuarfeqarfiit, meeqqeriviit, siunnersorneqarneq kiisalu immikkoortoqarfiit assigiinngitsut suleqatigiittarnerat.

-Isumasioqatigiinnitsinni sapinngisamik suliassat siunissami assigiissarneqarnissaat nassaariniassavarput. Suliassat qanoq ataqatigiissaarneqassanersut, nukigut qanoq ataatsimut atorsinnaanerivut kiisalu assigiissuteqarutta qanoq taakku tamatsinnut iluaqutaasumik atorsinnaanerivut nalilersussavagut, taama oqarpoq Kiista P. Isaksen, Narsami borgmesteri, Kujataamioqatigiinni aamma siulittaasuusoq.

Siulittaasuuffik siorna kommuninut qinersereeratta Qaqortup Kommunianiit Narsamut tunniunneqarpoq aappaagulu Nanortallip akiussaaffigilissavaa.