Kommunit: Ilinniartitsisut suliaminnik aallussilluarput

Ilinniartitsisunngorniarluni Ilinniarfissuarmi pissutsit sutigut tamatigut pitsaavallaanngitsutut Danmarkimi naliliisarfimmit nalilerneqarpoq. Tunngavilersuilluarnikkullu tamanna aaqqiivigineqarnissaa kommunit kissaatigaat.

 - Taamatut nalilersuinerit inerniliisarneri ajortuunngilaq, iluaqununa. Massakkut ajornartorsiut sumiinnersoq takusinnaanngorparput, taamaattumillu assigiimmik aallaaveqarluta aaqqinnissaanut eqqartueqatigiissinnaanngorpugut eqqoriaanerit piunnaarlugit, KANUKOKA-mi pisortaq, Hans-Peder Barlach Christensen, oqarpoq.

Ilinniarfiup pitsaassusaa nalunaarusiami isornartorsiorneqarpoq, ilaatigut aqutsinikkut ajornartorsiuteqarluinnartoq tikkuarneqarluni. 

Aamma atuaruk Ilinniarfissuaq EVA-p naliliinerani angusinngitsoortoq

Ataasiakkaanulli tikkuartuinikkut iluarsiisoqarnavianngitsoq, KANUKOKA-p pisortaata erseqqissaatigaa. 

Soqutigisaqaqatigiit ataatsimoorlutik tunngavilersuilluarnikkut aaqqiissutissamik ujartuisariaqartut, pisortaq isumaqarpoq.

- Erseqqilluinnavittumik oqaatigisariaqarpoq; ilinniakkamik naammassinnissimasoq ilinniakkani naammassivaa. Taannanngilaq uparuarneqartussaq, kisianniuna ataqatigiinnera, systemep ingerlarnga. Naammassinninnikuusut taanna akisussaaffiginngilaat.

Pisortaq Hans-Peder Barlach Christensen Kommuneqarfik Sermersuumi Atuarfinnut Paaqqinnittarfinnullu pisortamit ilassilluarneqarpoq.

Ilinniartitsisugut suliaminnik aallussilluarput, atuartuutittalu angusarissaarnerunissaat pillugu ullut tamaasa sulilluartarlutik, pisortaq Jesper Madsen oqarpoq.

Ilinniartitsinerullu ineriartortinnissaa anguniarlugu naliliineq sakkussaavoq pitsaalluinnartoq, ilinniartitsinerullu pitsanngorsaavigineqarnissaanut sulinermi kommunit sunniuteqaqataasinnaasut Kommuneqarfik Sermersooq isumaqarpoq.

 - Ilinniarfissuarmi peqataatinneqarnissarput ujartorparput, ilinniartitaanerummi tungaatigut eqqartueqataanitsigut siunissami aaqqiissutaasinnaasunik ataatsimoorluta nassaartorsinnaagatta.

Naliliinerup saqqummiunneqarnerata malitsigisaanik "Siunissaq pillugu ilinniartitsisunngorniarfimmik" qulequtalimmik isumasioqatigiisitsinissamut Ilisimatusarfik apriilip 27-ani qaaqqusivoq, tassungalu soqutigisaqaqatigiit pingaarutillit qaaqquneqarput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl