Kommunit avannarlersaat: Borgmesterip pisortat taarserarneri nassuerutigigai
Nunatsinni kommunit avannarlersaata, isortussutsimigut 522.700 kvadratkilometerinik annertussuseqarlunilu illoqarfimmini sisamani nunaqarfimminilu 23-ni 10.522-nik innuttaqartup, allaffissornikkut aaqqissuuteqqinnera oqitsuinnaasimanngilaq.
Tamanna Avannaata Kommuniani borgmesterip, Palle Jeremiassenip (S), ukiortaami oqalugiaammini nassuerutigaa.
AAMMA ATUARUK Qaammatit sisamat qaangiuttut: Avannaata Kommuniani pisortaaneq soraartoq
- Pingaartumik kommunitta allanngornera eqqarsaatigissagaanni pisortat taarseraannerat ajoraluartumik nalaattarsimavarput, taanna taama oqarpoq, imalu nangilluni:
- Pissutsit tamakku kommunitut allanngornitta suleriusissatsinnik tulluarnerpaamik ujartuinitsinni naleqqussarnitsinnilu aqqusaagassaasimapput avaqqunneqarsinnaanngitsut, ilinniarfiusullu, taamaakkaluartorli kommunalbestyrelsimi qinikkatut siunnerfeqaqatigiinnerput allanngorneq ajorpoq.
Isorliunerusuniittut paamaarunneqartut
Nunatsinnili kommunit avannarlersaanni, Ilimanamit Siorapaluk angullugu inoqarfeqartumi, borgmesterip innuttaminut nassuerutigisaa taannaannanngilaq. Borgmesterimmi aamma nassuerutigaa kommunimi tamarmi ineriartortitsisoqarsimanngitsoq.
AAMMA ATUARUK Upernavimmi utoqqaat illuata ilaneqarnissaa kinguartinneqartoq
- Pingaartumik avinngarusimanerusuni ineriartorneq arriippallaamik ingerlavoq – tamatumani sumiiffiit tikikkuminaannerunerat, taamalu sanaartornermi akit qaffasippallaarnerat, sanaartornermi allanik ulapputeqarneq, taamalu sanaartorniarnermi sulisussaaleqineq atuupput, borgmesteri oqarpoq, nangillunilu:
- Naallu avinngarusimanerusuni sanaartornissamik kommunalbestyrelsimi aalajangiisoqartaraluartoq, pissutsit taakkartukkakka pissutigalugit ineriartortitsiniarneq arriitsumik ingerlavoq. Kommunerput nukittorsarusullugu ilungersorpugut.
Umiarsuaq takornariartaat ullormut ataaseq annerpaamik 1000-nik ilaasulik
Palle Jerimiassenip ilanngullugu oqaluttuaraa kommuni takornariaqarnermut sullissivimmik pilersitsinissaminut suliniuteqartoq. Kommunimi nunatsinnut takornarianit ornigarluarneqarnerpaasartoq taamaattumik peqanngilaq.
- Takornariaqarneq inuussutissarsiutitut annertusiartorpoq, sulilu pitsaanerusumik ineriartortittuarnissaa anguniarlugu takornariaqarnermut sullissivimmik pilersitsinissaq sulissutigaarput, Palle Jerimiassen oqarpoq.
Taassuma ilanngullugu oqaatigaa umiarsuit takornariartaatit tikittut tamarmik kommunimit qujarunneqartartut, taakkuali iluanaarfiusumik aningaasarsiutaasinnaanerat aamma apeqquserlugu.
AAMMA ATUARUK Takornariartaatit aatsaat taama amerlatigisut Ilimanniassapput
- Kivissinnaasarput naapertorlugu ataavartumik tikittarnissaat anguniartariaqarparput, isumaqatigaakkalu Ilulissani takornariaqarnermut siunnersuisooqatigiit siunnersuuteqarmata ullormut umiarsuit tikittartut ataasiakkaartunngortinneqarnissaat, amerlanerpaamillu ullormut 1000-nik ilaasoqartarnissaat siunnersuutigimmassuk, taanna taama oqarpoq.
Takornariat pinngortitamik aserfallaanerminnut 2020-mit akiliuteqartinneqartalissasut
Takornariallu pinngortitamik atuinerminni aserfallatsitsiartornerminnut akiliuteqartinneqartalissapput, kommunimi taakkunnga ullumikkut aningaasartuuteqartareerpoq.
- Eqqarsarnarpoq avatangiisitsinnik, pisariaqartitaannullu atuinerat, uagut kommunitut kisitta aningaasalersoratsigu.
AAMMA ATUARUK Suliniut nutaaq: Avannaata Kommuniani illoqarfiit atuarfiini tamani siunnersortit
- Takornariat avatangiisimik atuinerminnut, pisariaqartitaminnullu atuinerminnut akiliisalernissaat pisariaqarpoq, soorlu Ilulissani Unescomut 2020-mi aallartittumik akiliisalernissaat sulissutigineqarluni aallartissasoq, takornariat siunissami qanoq ilillutik aamma qanoq annertutigisumik akiliisinneqartalissanersut annertunerusumik ersarissanngikkaluarlugu taama oqarpoq.
Palle Jerimiassenip ukiortaami oqalugiaataa tamakkiisoq allaaserisap aallartinnerani takoqqissinnaavat, ilaatigut tassani sammisat allat, soorlu meeqqanut, meeqqat atuarfiannut aamma aalisarnermut tunngasut eqqaaneqarput.
