Upernavimmi utoqqaat illuata ilaneqarnissaa kinguartinneqartoq

Allaaserisami siusinnerusukkut allassimagaluarpoq, utoqqaat illuat 100 kvm.-iusoq. Kisitisisit kukkusut maanna persimalerput.

Avannaata Kommunianit ukiuni arlalinni agguarlugu suliarineqartussanngorlugu kinguartinneqarpoq ilaneqarnissaanut suliariumannittussarsiornermi neqeroorut akisuallaarsimammat.

Upernavimmi Utoqqaat Illuat ukioq manna ilallugu aallartinneqartussaagaluartoq  sanaartorlugu aallartinneqanngitsoorpoq.

- Suliap akitigut qaffasippallaarnera taanna tunngaviuvoq ukiup tullianimut kinguartinneqarnera, Avannaata Kommuniani borgmesteri Palle Jeremissen oqarpoq.

Avannaata Kommuniami Upernavimmi Utoqqaat Illuata ilaneqarnissaanut  upernaaq suliariumannittussarsiuussivoq.

- Kisianni kvadratmeterimut akia imannak qaffasitsigivoq kommunalbestyrelsiminngaanniit akuersaarneqarsinnaanani, borgmesteri oqarpoq.

AAMMA ATUARUK Utoqqaat kaallutik innartarsimasut

Avannaanimi sanaartornermi suliaqartut piffissami matumani ulappunnerat avannarpasinnerusuni neqeroortitsinermut akitigut sunniuteqarsimavoq.

- Maani naliginnaasumik 20.000 koruunit missaaniippoq kvadratmeterimut. Massakkut avannaani suliassat - uagut suliassaatigut aamma pisortaqarfiit Selvstyrep ataaniittut - immaqa 40 imaluunniit 60.000 inissinneqarsimammata, innuttaasullu aningaasaataat uagut pitsaasumik atorneqarnissaat akisussaaffigigatsigu akisugalugit taakkua unitsinnikuuagut.

Taamaalillunilu Upernavimmi utoqqaat illuata ullumikkut 22-init najugaqarfigineqarsinnaasup inissanik 29-nik ilaneqarneranik kinguneqartussaq, ukiunut arlalinnut agguarlugu suliarineqarnissaa maanna siunniunneqarpoq.

- Taamaattumik aggulunneqarneratigut aamma piffissap sivitsorneqarneratigut neriuutigivarput aningaasartuutit appartinneqarsinnaassasut. Aamma taanna sulissutigivarput, Palle Jerimiassen oqarpoq.

Upernavimmi Utoqqaat Illuata ilaneqarnissaanut suliaq 2012-imili aallartisarneqartoq Namminersorlutik Oqartussanit aamma Avannaata Kommunianit ukiuni tulliuttuni marlunni katillugit 36 millioner koruuninik aningaasaliiffigineqartussaavoq.