Utoqqaat kaallutik innartarsimasut

Aasianni Utoqqaat Illuanni najugaqartut unnukkiorsiornerminni iluamik qaarsillarsimatinnatik kaallutik innartariaqartarsimapput. Tamanna ombudsmandip 2017-imi ukiumoortumik nalunaarutaani atuarneqarsinnaavoq.
Assi © : KNR
Allattoq Kathrine Kruse
septembarip 23-at 2018 13:17

Ombudsmandip inassuteqaatigisimavaa utoqqaat illuanni najugaqartut igaffiup ammaffiata avataatigut nerisassaqarsinnaanissaat Utoqqaat Illuata qulakkiissagaa.

Inatsisartut ombudsmandiata siumut nalunaaruteqqaqqaarani Aasianni Utoqqaat Illuat siorna novembarip naajartulernerani misissuiartorfigaa.

Ombudsmandilu utoqqaat utoqqaat illuanni, paaqqutarisariaqanngitsunut immikkoortortaqarfeqarnermi saniatigut puigortunngortunut aamma paaqqutarisarialinnut immikkoortortaqarfilimmi, najugaqartut atugaannik isornartunik arlalinnik misissuinermini naammattuugaqarpoq.

Nerisat sinnimineri aamma yoghurtimerngit
Ombudsmandip utoqqaat illuanni misissuereerluni nalunaarusiaanit atuarneqarsinnaavoq sulisut sisamat ombudsmandip misissuinerani nassuiaasimasut najugaqartut unnukkut unnuakkullu Utoqqaat Illuata iggaviata matoqqanerata nalaani kaalersimasut nerisassaqartittanngikkitik.

- Allaffiit ilaanni nillataartitsivimmi ilaanneeriarluni sinnikoqartarpoq, tamatumali saniatigut taamaallaat yoghurtimineqaannartarluni. Taamaattumik najugaqartut unnukkorsiornerminni iluamik qaarsillarsimanngitsut kaallutik innartariaqartarsimapput, ombudsmandip misissuiartorsimaneranit nalunaarusiami ilaatigut taama allassimasoqarpoq.

Ombudsmandi: Najugaqartut nerisassaqarnissaat qulakkeerneqassaaq

Igaffiup pisortaata misissuiartortunut nassuiaatitut oqaatigisimavaa paaqqutarinninnermi sulisut ullut tamaasa ataatsimeeqatiginerini amigaateqarnersut aperisaraluarini, unnukkulli unnuakkullu nerisassanik amigaateqartoqartartoq paasitinneqarsimanngisaannarluni.

- Igaffimmi sulisut angerlaraangata nillataartitsivimmi nerisassaqarnerusalernissaa pilertornerpaamik isumaginiarpaa, nalunaarummi taama allassimasoqarpoq.

Tamatumali saniatigut ombudsmandip inassuteqaatigaa utoqqaat illuanni najugaqartut igaffiup ammaffiata avataatigut nerisassaqarsinnaanissaat Utoqqaat Illuata qulakkiissagaa.

Ombudsmandip inassuteqaatigisimasai qanoq naammassineqarsimanersut KNR-mit Kommune Qeqertalimmut paasiniaavugut, sulili uterfigineqanngikkallarluta.

Inassuteqaallu taanna Qaasuitsup Kommuniusimasumit malinneqarsimavoq, kommuniusimasummi ombudsmandip inassuteqaataa november 2017-imi malillugu utoqqaat Aasianni Utoqqaa Illuanni najugaqartut igaffiup matoqqanerani aamma nerisassaqartinneqartarnissaat qulakkeersimavaa. Taama Kommune Qeqertalimmi borgmesteri Ane Hansen ilisimatitsivoq.