Qaammatit sisamat qaangiuttut: Avannaata Kommuniani pisortaaneq soraartoq

Avannaata Kommuniani kommunalbestyrelsi aamma Søren Stach Nielsen illuatungeriillutik Søren Stach Nielsenip ukiup naaneranit soraarnissaa isumaqatigiissuteqarfigivaat.

Taama kommune tusagassiuutinut nalunaaruteqarpoq.

Taamaalilluni Søren Stach Nielsen Avannaata Kommuniani qaammatini sisamaannarni pisortaaneruinnariarluni soraarpoq.

AAMMA ATUARUK Avannaata Kommunia pisortaanermik nutaamik atorfinititsivoq

Søren Stach Nielsenip pisortaanertut suliunnaariataarnera pillugu, pineqartoq aamma borgmester Palle Jerimiassen, KNR-imit ulluni kingullerni oqaaseqartinniarsimagaluarpagut - iluatsinnagilli.

Pisortanit arfineq-marlunnit marluk kiserngoruteqqasut

Kommuunimi pisortani arfineq-marluusuni, pisortaanerup atorfia ilanngullugu, pisortatut atorfiit sisamat qaammatini kingullerni pisortaangallartunit inuttaqartinneqarsimapput.

Ingerlatsiviillu pisortaqanngikkallartut tassaapput Ataatsimoorussanik sullissinermut Ingerlatsivik, Ilaqutareeqarnermut Ingerlatsivik, Peroriartortitsinermut Ingerlatsivik aamma Inuussutissarsiornermut Ingerlatsivik.

Taamaalilluni Avannaata Kommuniani pisortat maanna marluinnaangallarput: Nick Nielsen aamma Dorthe Løvstrøm Mathiesen. Dorthe Løvstrøm Mathiesen aningaasaqarnermut pisortatut atorfinitsinneqaqqammerpoq.

Palle Jerimiassen pisortaqarneq pillugu KNR-imit aamma oqaaseqartinniarsimagaluarparput - tassanili aamma iluatsitsinngilagut.

Søren Stach Nielsen pisortaanertut juulimi ukioq manna atornitsinneqarpoq.

Avannaata Kommunia naapertorlugu kommuunip aamma Søren Stach Nielsenip soraarnerani isumaqatigiissutigineqartut isortuunneqartussanngortinneqarsimapput.

Teknikkeqarnermut pisortaq Nick Nielsen kommunimi pisortaanertut atorfinitsikkallarneqarpoq.