Kommunit ammaannartumik eqqakkanik ikuallaanissamut sivisunerusumik periarfissaqalertut

Kommunit eqqakkanik ammaannartumik ikuallaasarnissaat Naalakkersuisunit aappaagu juulip 31-ata tungaanut sivitsorneqarpoq.

ESANI A/S nuna tamakkerlugu eqqakkanik amerlanerpaanik aallertarpoq, nunali tamakkerlugu eqqakkat suli ajornartorsiutigineqarnerat innuttaasunut akornutaaginnassammat, eqqakkat pillugit nalunaarummi allannguisoqarnissaanik kissaateqarneq naalakkersuisunit akuersissutigineqarpoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik tusagassiutinut nalunaarummi allappoq.

Eqqagassalerinermi annertuumik unammilligassaqartoq

Nuna tamakkerlugu eqqakkanik ikuallaaviit tamakkiisumik ingerlalernissaat 2025-p qiteqqunnerani naatsorsuutigineqarpoq. Naalakkersuinikkullu ataqatigiissaarisoqatigiit ataatsimiinneranni naalakkersuisunit kommuniniillu ammaannartumik ikuallaasarallartoqarnissaa periarfissaalissasoq kissaatigineqarpoq.

- Ammaannartumik ikuallaasarnerit sapinngisamik pisinnaatillugu pinngitsoortinneqarnissaannik isumaqarnera attatiinnarpara, Nunalerinermut, Imminut Pilersornermut, Nukisiutinut Avatangiisinullu Naalakkersuisoq Kalistat Lund tusagassiutinut nalunaarummi oqarpoq.

Eqqagassalerinermik suliassaqarfinni annertuumik unammilligassaqarnera pissutigalugu eqqakkanullu ikuallaaviit marluk naammassineqarnissaata tungaanut ajornartorsiut isiginngitsuusaaginnarneqarsinnaanngitsoq, Kalistat Lundip tusagassiutinut nalunaarummi erseqqissaatigaa.

Immikkut akuerineqartoq

Naak immikkut akuersissut sivisunerpaamik qaammatini pingasuni atuutsinneqartartoq, eqqakkat pillugit nalunaarummi piumasaqaataagaluartoq, immikkut ittumik akuersissuteqartoqarsinnaasoq naalakkersuisunit aalajangerneqarpoq.

Kommunit tapersersorniarlugit Naalakkersuisut eqqagassalerinermut suliassaqarfinnut ukiuni kingullerni pingasuni 19 millionit koruuninit amerlanerusunik tapersiipput, ilaatigullu 2022-mi 2023-milu eqqakkanik katersilluni angalanissamut aamma aningaasaliillutik.

Eqqakkallu ajornartorsiutaanerat suli annertoorujussuummat immikkut aningaasassanik aningaasaliisoqareeraluartoq, ESANI A/S-ip 2024-mi eqqakkanik katersilluni angalanerata ataatsimik ilaneqarnissaanut naalakkersuisut 3,2 millionit koruuninik tapiissuteqartut, tusagassiutinut nalunaarummi allaqqavoq.