Inuit innarluutillit pillugit inatsisissaq Kommunini sulisussaqarnissaq qulakkeerneqartariaqartoq

Inuit innarluutillit pillugit inatsit pisoqalisoq ullutsinnut naleqqussarneqareerluni pingajussaaneerneqartussanngorpoq.

Inatsisissaq utaqqisaasimaqaaq, inuimmi innarluutillit atugarliortutut taavalu aamma ikiorneqarnissaminnut ikorfartorneqarnissaminnullu unamminartorsiortutut saqqummiunneqartarput.

AAMMA ATUARUK Inuit innarluutillit pisinnaatitaaffii ullumikkornit pitsaanerulissasut

Tamakku ilaatigut inuttut pisinnaatitaaffiit pillugit institutimit aamma tikkuarneqareerput.

Pisortat suliffeqarfiini innarluutilinnut ilisimasaqarluartunik ilinniarsimasunik sulisukippallaarneq, isornartorsiutinut ilaapput.

Isumaginninnermut naalakkersuisoq Martha Abelsen naapertorlugu kommunit allaffissornerulissapput taamaalillutillu aningaasartuuteqarnerulerlutik. 

Tassalu piffissaq tamaat sulisunik arfineq pingasunik naleqassasut, imaluunniit 4 millionit koruuninik aningaasartuutaanerussasut naatsorsuutigineqartoq, naalakkersuisoq nassuiaammini allappoq.

Sullissisussat amigaatigigaat

Inuit innarluutillit pillugit inatsisissaq akuerineqartinnagu sulisussaqarnissamik Naalakkersuisut qulakkeerinneqqaartariaqartut, Kommuneqarfik Sermersooq tusarniaanermi allappoq.

- Inatsisissatut siunnersuutip anguniagai annertuut kommunini isumalluutinik
annertoorujussuarnik, matumani aamma sulisussanik naammattunik piukkunnaatilinnik piumasaqaateqassasut uparuassallugu naleqquttuuvoq, kommuni allappoq, nangillunilu:

AAMMA ATUARUK Nunatsinni innarluutillit atugaat kommuninit arlalinnit isornartorsiorneqarput

AAMMA ATUARUK Innarluutilinnut ikiuisarneq pitsaanerulissaaq

- Taakkumi inatsisip atortuulerfiani pigineqarsinnaanerat qularnarmat, aamma inatsisip atuutilersinneqarnissaata malinneqarnissaatalu pitsaasuunissaannik siunertaqaraluaraanniluunniit, Kommuneqarfik Sermersooq allappoq. 

Kommune Kujalliup Inatsisissatut siunnersuutip malittarisassanik sukumiinerusunik aalajangersaanissamut 34-nik pisinnaatitsissusiinera naalakkersuisunut erseqqissarpaa, oqaatigalugu qanorpiaq sunniuteqassanersoq nalileruminaattoq.

Kommunip ilaatigut najorteqarsinnaatitaaneq qulakkiigassarilissavaa. Tamatuminngali naammassinnissinnaanissaq kommunip qularaa.

- Siunnersuut kommunini anginerni aallaaveqarsorinarpoq illersuisut pisariaqartinneqartut amerlassusaat katersorsinnaallutik. Taamaammat Kommune Kujallermi illersuisut suliaminnik aallaavilimmik soqutigisaqarnerminni aporaatinngitsumik naammattunik pissarsisoqarsinnaanersoq qularnarpoq, Kommune Kujalleq allappoq.

Pikkorissarneqassasut

Isumaginninnermut naalakkersuisoq naapertorlugu kommunini isumaginninnermut sullissisut inunnik innarluutilinnik sullissisinnaanermut pikkorissarneqassapput.

- Ilitsersuut utaqqineqassanngilaq ukiut arlallit. Ilitsersuut piareeqqassaaq. Tunngavigalugu taanna pikkorissaanerit akuersinerminngaanniit ukiup sinneranut ingerlanneqassapput. Kommunini tamavinni sullissisussat pikkorissarneqassapput, Martha Abelsen oqarpoq.

Inatsisissatut siunnersuut akuerineqarpat januaarip aallaqqaataani 2020-mi atuutilissaaq.