- Peqqinnissaqarfik, atuarfeqarfiit, ilinniagaqarfiit, kommunit, ataatsimoorussamik sullississapput, inuit innarluutillit illersuisuat oqarpoq.Assi: KNR

Inuit innarluutillit pisinnaatitaaffii ullumikkornit pitsaanerulissasut

Inuit innarluutillit tapersersorneqarnissaannut inatsisissaq piviusunngornissaa qalliallappoq. Tamannalu inuit innarluutillit illersuisuanut tusarluarnartuuvoq.

-Nuanneq. Kiisami upperilersinnaavarput, Inuit innarluutillit illersuisuat Christina Johnsen, inuit innarluutillit pillugit inatsisissatut siunnersuut aappassaaneerneqareersoq, oqarpoq.

Inatsisissatut siunnersuut taanna, ukiumik ataatsimik kinguartinneqarmat, soqutigisaqartunik utaqqisitsilerpoq.

Inatsit ukiunik 25-nik pisoqaassusilik

- Kalaallit Nunaanni inuit innarluutillit ikiorneqarnissaminnut ikorfartorneqarnissaminnullu periarfissaat naammaginanngillat.

Inuttut pisinnaatitaaffiit pillugit instituti Naalagaaffiit Peqatigiit Innarluutillit pillugit ataatsimiititaliaata nalunaarusiaani taama isornartorsiuivoq.

AAMMA ATUARUK Innarluutilinnut inatsisip utaqqisinneqarnera akilersinnaalluarpoq

AAMMA ATUARUK Kinguartinneqarniarnera naleqqutinngilluinnarpoq

 

Paaissutissat: 

Naalagaaffiit Peqatigiit Innarluutillit pillugit isumaqatigiissutaat, Danmarkip atsiorsimasaa, naapertorlugu inuit innarluutillit inuiaqatigiinnut akuunissaminnut aporfeqannginnissaat pisariaqartitaminnillu ikorfartorneqarnissaat naalagaaffiup akisussaaffigaa.
Naalli tamanna nunatsinnut atuukkaluartoq suli naammassineqanngilaq. 

Ilaatigut tamanna pissutaalluni innarluutilinnut inatsit 1994-imeersoq inuit innarluutillit pisinnaatitaaffiinut, Naalagaaffiit Peqatigiit isumaqatigiisutaanniittumut tulluarsarniarlugu, Naalakkersuisut maanna sukaterniarpaat. 

Naatsumik oqaatigalugu innarluutillit pisinnaatitaaffii ullumikkornit pitsaanerulissapput.

- Inuk innarluutilik pisinnaatitaaffeqalissaaq sullinneqassalluni, pisortat taavalu susassareqatigiit assigiinngitsut peqataatissallugit, soorlu peqqinnissaqarfik, atuarfeqarfiit, ilinniagaqarfiit, kommunit, ataatsimoorussamik sullississapput, illersuisoq oqarpoq.

Pitsaanerusumik sullinneqartalissasut

Allannguutissat inatsimmi maanna atuuttumut sanilliullugit ilaatigut tassaapput:

Inatsit maanna atuuttoq naapertorlugu inuit innarluutillit siunnersorneqarnissaq tapersersorneqarnissarlu maannamut neqeroorutaannaasussaagaluartoq inatsit allanngorpat  pisinnaatitaaffiulissaaq. 

Oqartussanut maanna saaffiginninnermi, sorliup akisussaasuunera nalornissutigineqartartoq, Inuit innarluutillit oqaaseqartartuata tikkuareerpaa.

 

Assi: INUIT ANNERTUUMIK INNARLUUTILLIT QANOQ AMERLATIGINERANNIK NAATSORSUINEQ, Naalakkersuisut, 2017.

 

Inatsilli atuutilerpat tamanna ersarinnerulissaaq.

- Neriuutigivarput imatut sunniuteqarsinnaasoq; matu ataaseq iserfigigaanni taava sullinneqarnissaq tassaniissaaq, saaffiginnittut sumut tamaanga miloriussorneqarunnaarlutik. Taanna neriuuteqarfigilluartorujussuuvarput.

Taava aamma inatsisissatut siunnersuut akuerineqarpat inuit innarluutillit kommunalbestyrelsimit najugaqatigiiffimmik neqeroorfigineqarnissaq pisinnaatitaaffigilissavaat.

Suliassarpassuit

Inatsisissatut siunnersuut juunip tallimaani pingajussaaneerneqassaaq.

Piviusunngussappallu kommunit suliassaqassaqisut, illersuisup qularinngilaa:

AAMMA ATUARUK Nunatsinni innarluutilinnut periarfissat naammanngitsut

- Aamma isumaqarpunga, isigineqartussaasariaqartoq kommunini sullissisussat naammappaat, imaluunniit ilassappaat. Allannguut annertuvoq taavalu pisinnaatitaaffinnut tunnganerupput. Tassa imaappoq; inuk innarluutilik assigiinngitsunik ikiorserneqarnissamut pisinnaatitaaffeqalerpoq, inuit innarluutillit oqaaseqartartuat Christina Johnsen oqarpoq.

Inatsisissatullu siunnersuutip Inatsisartuni akuersissutigineqarnera inatsimmik siunnersuuteqartuusup, nuannaarutigaa:

- Suliaq annertooq naammassiartuaartutut isikkoqalermat inuit, ukiut arlalissuit suliamik suliarinnissimasut, tassunga killittut oqilisimaarput. Inuit innarluutillit eqqarsaatigalugit ulloq aamma angisoorujussuuvoq, isumaginninnermut naalakkersuisoq Martha Abelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat