Innarluutilinnut inatsisip utaqqisinneqarnera akilersinnaalluarpoq

Innarluutilinnut inatsit ukiumik ataatsimik kinguaattooqqasoq Inatsisartut marsip 22-anni ataatsimiilerpata ilaatinneqassaaq.

- Qilanaarnaqaaq innarluutillit illersuisuat, Christina Johnsen oqarpoq.

Taassuma inatsisip siorna kinguartinneqarluni, aappaagu januaarip aallaqqaataani aatsaat atuuttussanngortinneqannginnera naammagisimaarsimanngilaa. Naalli uggornaraluartoq utaqqineq akilersinnaasoraa.

AAMMA ATUARUK Det er helt urimeligt

- Inatsisissap ilusilersornera kusanarnerusoq aamma atoruminarnerussasoq isumaqarpunga. Aamma akisussaaffiit - kikkut suna sliarissagaat - ersarinneruleqasutut isigilerparput. Taamaammat aamma atuisussat, soorlu kommunini sulisut immaqa oqinnerusumik sakkussaqalerput.

Inatsit nutaaq ukiaq tusarniaassutigineqaqqippoq tamatumalu kingorna innarluutillit illersuisuata kissaatigisaasa ilaat ilaatigut ilanngunneqarput.

AAMMA ATUARUK Innarluutilinnut inatsisissaq atuutilersinniaannarlugu atuutilersinneqassanngilaq

Suliamik isumaginninnermi piffissaliisoqarsinnaaneranut piumasaqaasiortoqassaaq, taamatullu innarluutillit najugassaannut neqeroorutit pitsaassusaannut minnerpaaffissaliinermik ilaatigut qulakkeerisoqassalluni.

- Oktobarimi tusarniaaffigineqaratta takkajaalaamik ilanngussivugut. Taakkua ilanngussimasut takullugit nuannaarutigivagut.

Inuit Pisinnaatitaaffiinut Instituttip nalunaarusiaq innarluutilinnik susassaqarfinnut isornartorsiuisoq innarluutilinnullu atugassarititaasut pitsaannginnerat pissutigalugu aallartartorpassuarnik sammisaqartoq februaarimi saqqummersippaa.

AAMMA ATUARUK Hjælp til grønlændere med handicap er ikke god nok

Christina Johansenip oqarnera naapertorlugu innarluutilinnut inatsit immikkoortunut isornartorsiorneqartunut qanoq qulakkeeritigissanersoq oqaatigissallugu ajornartorujussuuvoq, assersuutigalugu inuiaqatigiit inunnut innarluutilinnut qanoq tikikkuminartitiginerat pineqartillugu. Taamaakkaluartorli ilorraap tungaanut alloriarnerusoraa.

- Ullormiit ullormut allannguinissaq upperinngilarput. Kisianni ullut tamaasa siumut aallariartornissaq ornikkutsigu ajunngitsuuvoq.