Frederiksen: Innarluutilinnut inatsisissaq atuutilersinniaannarlugu atuutilersinneqassanngilaq

Inatsimmik atuisussat, tassa kommunini sullissisut, inatsisip atulinnginnerani innarluutilinnut pitsaasumik sullissiniarunik tamatuminnga paasissutissinneqaqqaartariaqarput pikkorissarneqaqqaarlutillu. Innarluutilinnut inatsisissap saqqummiunnissaata kinguartinneqarneranut isumaginninnermut naalakkersuisoq taama nassuiaavoq.
Assi © : Nils Baum, Bureau for Inatsisartut
Allattoq Aviâja Kilime , Thomas Munk Veirum
aggustip 29-at 2018 09:15

- Soorunami kissaatiginaraluaqaaq piaarnerpaamik atuutsitsilersinnaanissaq. Kisianni eqqaamasariaqarparput kommunini sullissisut aammalu nalinginnaasumik inatsimmut tassannga atuisussat aamma piareersarneqartariaqarput, piffissaqartariaqarput inatsisip paasititsiniutiginissaanut aammalu eqqortumik kusanartumillu atuutsinneqarnissaanut piffissaq taanna tigusariaqarpaat, Anthon Frederiksen, taama oqarpoq.

AAMMA ATUARUK Innarluutillit illersuisuat pingaaruteqartoq

Innarluutilinnut inatsisissaq 25 millionit koruuninik aningaasartalik 2019-imi atuutilernani nutarsarlugu aatsaat 2020-mi atuutilissasoq, Naalakkersuisut siunnersuutigaat. 

Tamanna innarluutillit illersuisuata Christina Johnsenip Inuit Ataqatigiillu siulittaasuata Sara Olsvigip isornartorsiorpaat.

Nunatsinni innarluutillit atugarissaarnerulernissaasa pisariaqarluinnarnera taakkua tunngavilersuutaanni pingaarnerpaavoq. 

AAMMA ATUARUK IA-p innarluutillit pillugit inatsisissap kinguartinneqarnera isornartorsiorpaa

Anthon Frederiksenilli inatsisissatut siunnersuutip tusarniutigineqaqqaarnissaa pisariaqarsoraa:
 
- Tassani soorunami isumaginninnerup iluani Naalakkersuisooqatigiinni isumaqatigiissuterput aamma qivianngitsoorsinnaannginnatsigu, aamma tassaniippoq innarluutilinnut tunngasut ilaqutarinnermut politikkeqarnissamut tunngasut tamakku tamarmik imminnut attuumassuteqartut soorunami  nalilersuinermi aamma ilaapput, Anthon Frederiksen oqarpoq, nangillunilu:
 
 - Nutaamik aallaqqaataaniik siunnersuusiortoqassanngilaq, soorunami nikisilaangassat assigiinngitsut nalilersorneqarput aamma oqaasertaliussat assigiinngitsut aamma tikinneqartartussaapput soorunami, Anthon Frederiksen taama oqarpoq.

Innarluutilinnut inatsisissap nutaap ukiumik ataatsimik kinguartinneqarnera akuersaarneqarsinnaanngilluinnarpoq. Peqatigiiffik INOOQAT taama isumaqarpoq.

Peqatigiiffup siulittaasua Benny Kokholm tusagassiutinut ima ilaatigut allaaserisaqarpoq:

- Ullumikkut inatsit 1994-imeerpoq, allannguutillu annikitsualuit eqqaassanngikkaanni nutarsarneqarsimanani. Inuiaqatigiinni kingullersaatinneqartuaannarnerat tamaanga killeqartariaqaleraluarpoq, Benny Kokholm oqarpoq.

Meeqqat innarluutillit inatsisissap nutaap atuutilersinneqarnissaanut atatillugu pisinnaatitaaffeqalilernerat, peqatigiiffiup nuannaarutigisimagaluarpaa.

 

Aamma atuaruk