IA-p innarluutillit pillugit inatsisissap kinguartinneqarnera isornartorsiorpaa
- Nalornissutiginngilluinnarpara piumassuseqarfigisimagaanni ukiaq mannamut inatsisissatut siunnersuut saqqummiunneqarsimasinnaagaluartoq naammassineqarlunilu januaarip aallaqqaataani atuutilertussanngorlugu. Minnerpaamik aamma periarfissaasimagaluarpoq saqqummiutissallugu upernaamullu naammassillugu taaavlu aasakkut 2019-imi atuutilersillugu, Sara Olsvig oqarpoq.
Inatsisissatut siunnersuut isumaginninnermut naalassuisuusimasup 2017-imi ukiakkut ataasimiinnermi namminerluni saqqummiusssaraa, tasssanilu siullermeerneqarluni.
AAMMA ATUARUK Det er helt urimeligt
Inatsisissap, ukiuni arlalinni piareersarneqartup, innarluutillit pisinnaatitaaffiisa pitsaanerusumik atuutsinnissaa qulakkiissavaa. Naalakkersiusut aningaasanut inatsisissatut siunnersuummi innarluutilinnut inatsisissaq 2020-mi aatsaat atuutilissasoq siunnersuutigaat.
Olsvig: Sipaarniarnertut nalilerpara
Siunnersuut iliuusissanik ukiumut 25 millionit koruuninik naleqartunik imaqarpoq, inniarluutilinnullu illersuisoq, Christine Johnsen, naapertorlugu iliuusissat pisariaqarluinnarput.
Kinguartitsiniarneq sipaarniarnertut Sara Olsvigip nalilerpaa:
- Taamaaliunnginnerli aammalu kinguartitsinermik oqaasertaliisimaneq sipaarniarnertut allatuullu pingaarnersiuinertut isigivara. erseqqissumillu oqaatigerusuppara uanga isumaqarpunga inuit innarluutillit uani suliami pingaarnersiorneqarlutik salliutinneqarsimasussaagaluartut sipaarniarnermilu sipaarfigineqaratik.
Naalakkersuisut ineqarnermi akileraartarnermilu aaqqissuusseqqinnerisigut Qeqertarsuullu Tunuani uuliasiornissamut aningaasaaliissutigineqartut 48 millionit koruuniusut pinngitsoortinnerisigut inatsisip aappaagu 2019-imi atuutilersinnissaanut aningaasaliisinnaagaluartut, Inuit ataqatigiit siulittaasuat oqarpoq.
