Innarluutillit illersuisuat pingaaruteqartoq

Innarluutilinnut illersiusortaap suliassai pingaaruteqarluinnartuupput nunatsinnilu illersuisoqarneq iluaqutaalluinnartuusoq, Ilimmarfimmi ilisimatooq Steven Arnfjord isumaqarpoq.

Steven Arnfjord inuit akunnerminni ataqatigiinnerannik Ilimmarfimmi ilisimatuujuvoq erseqqissaassutigalugulu, meeqqat illersuisuat innarluutillit illersuisuannut maligassaqqissuusoq, meeqqat pisinnaatitaaffii nunatsinni sammineqarnerulernikuummata.

- Meeqqat inatsisitigut atugaat politikkikkullu oqallinneq ataatsimut isigissagaanni, MIO ilanngussaqangaatsiarnikuuvoq, Steven Arnfjord KNR-imut oqarpoq.

AAMMA ATUARUK Innarluutillit pisinnaatitaaffii sammineqarnerussapput

Meeqqat politikerinit tusaaneqarnerulersimasut meeqqallu illersuisuata tamat oqartussaaqataanerat pitsaanerulersissimagaa, Arnfjord isumaqarpoq.
- Meeqqat nunatsinni isumalluutini pingaarnerpaasut Kim Kielsenip oqaluuserisarpaa, meeqqallu ukiorigaat nalunaarutigineqartuarpoq. Meerarlumi qitiutinneqassasoq politikkikkut sammineqartuarpoq.

Meeqqat pisinnaatitaaffii pillugit Naalagaaffiit peqatigiit isumaqatigiissutaat kommunit malikkuminnatsikkaat, meeqqat illersuisuata ukiut kingullliit arlallit eqqaasitsissutigiuarpaa. 

Meeqqat illersuisuat tusarnaarneqarpoq

Meeqqat illersuisuat isornartorsiuigaangat politikerit tusarnaartartut, Arnfjord isumaqarpoq. Naak meeqqat illersuisuat Namminersorlutik Oqartussanut kommuninulluunniit iliuuseqarsinnaanngikkaluartoq.

- Oqaaseqartartuuvoq pingaartulilik, tusaanngitsoorneqarsinnaanngitsoq. Taava politikerit qanoq iliussanerlutik aalajangertarpaat, Arnfjord oqarpoq.

AAMMA ATUARUK Meeqqat innarluutillit sammineqarnerussapput

Taamaammat innarluutillit pisinnaatitaaffii politikkikkut sammineqarnerulernissaat Steven Arnfjordip naatsorsuutigaa.

- Innarluutilinnut illersuisortaarneq aallaqqaammut pingaaruteqarpoq. Taassuma innarluutillit, inuiaqatigiit oqallineranni meeqqanit suli nipikinnerusuusut, oqaatigiumasaat annittassavai, Steven Arnfjord oqarpoq.                                                                                                      



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl