Innarluutillit illersuisuat: Innarluutillit pisinnaatitaaffii sammineqarnerussapput

Nunatsinni siullermeersumik innarluutillit illersuisortaarput. Illersuisussap Christina Johnsenip innarluutillit pisinnaatitaaffiisa nakkutigineqarnerulernissaat sulissutiginiarpaa.
Assi © : Christina Johnsen
Allattoq Jonas Fievé, Paninnguaq Steenholdt
septembarip 27-at 2017 14:18

Taanna inatsisilerituutut ilinniarsimasuuvoq, eqqartuussisoqarnerlu ilisimaarilluarlugu. Innarluutillit suliffeqarfinni atugaat eqqumaffigineqarnerulernissaat ilaatigut sulissutiginiarpaa.

 - Aanaartoornikut soorlu tassani suliffimmi attatiinnarnissaat, soraarsitsineq ajornanngippallaarpoq, Christina Johnsen KNR-imut oqarpoq.

AAMMA ATUARUK Nunarput Inunnut Innarluutilinnut illersuisoqalertoq

Atugarisaat sussaanngitsut

Nunatsinni innarluutillit inatsisitigut atugarisaat ataatsimut isigalugit sussaanngitsut, Christina Johnsen isumaqarpoq. 

Kommuneqarfiit innarluutilinnut ullumikkut siunnersuisuusarlutillu aalajangiisuusarput, isumaginninerlu pillugu aalajangiisartuni innarluutillit pillugit suliat ikittuinnaat tiguneqartartut, Christina Johnsenip maluginiarpaa.

- Siunnersuisinnaaneq amigartutut isigisarpara, soorlu kommune arlaatigut aalajangiiguni taava periarfissaasarami aamma social ankenævn aqqutigalugu sulianik nangititseqqinnissaq, Christina Johnsen oqarpoq.

Nunatsinni innarluutillit pisinnaatitaaffiisa qulakkeerneqarnissaat naammassiniarlugu illersuisoqalissasoq, Inatsisartut upernaaq manna aalajangerpaat.

AAMMA ATUARUK Oqaaseqartartoq nutaaq pisinnaatitaafinnik kivitsissaaq

- Maluginiakkama ilagivaat innarluutillit tusaaneqarniartarnerat killeqartorujussuusoq, Christina Johnsen oqarpoq.

Inuiaqatigiit naligiinneruleqqullugit isummiuteriikkanik piiagassaqarpoq, innarluutillit illersuisortaavat oqarpoq.

Christina Johnsen inatsisilertuutut misilittagaqaraluarluni atuuffimmini nutaami suliassani iserfiginiaqqaarniarpai. 

Siullertullu Innarluutillit ulluinnarni misilittagaannik tusagaqarumalluni innarluutilinnik taakkualu qanigisaannik oqaloqateqarniarpoq.

Innarluutillit illersuisuata suliani aallartisaleruttorpai, aamma inatsisissatut siunnersuut ilanngullugu.

 - Inatsisissaq nutaaq siunnersuutigineqartoq kusanarnerusumik ilusilersorneqarsimavoq. Periarfissiilluni innarluutillit namminneq aamma pisinnatitaaffitsik atorluarnerusinnaassagaat, Christina Johnsen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk