Siunnersuisoqatigiit: Oqaaseqartartoq nutaaq pisinnaatitaafinnik kivitsissaaq

Innarluutillit oqaaseqartartuanik Naalakkersuisut pilersitsippata innarluutillit tusaaneqarnerusalissapput. Inuit Pisinnaatitaaffii pillugit Siunnersuisoqatigiit innarluutillit pisinnaatitaaffii pillugit Namminersorlutik Oqartussat ataatsimeeqatigereerlugit taama oqarput.

Allattoq Sara K. Jakobsen

septembarip 13-at 2016 17:13

- Oqallinneq aallartittariaqarpoq, innarluutillit atugarisaat tamakkiisumik tusartariaqalerpagut, Inuit Pisinnaatitaaffiit pillugit Siunnersuisoqatigiit siulittaasuat Inge Olsvig Brandt oqarpoq.

Taakkua, isumaginninnermut naalakkersuisoqarfik Innarluutillillu pillugit Ilisimasaqarfik Siunnersuisarfiutigisorlu innarluutillit pisinnaatitaaffii pillugit ataatsimeeqatigiinnerminni, meeqqat oqaaseqartartuata assinganik, innarluutillit oqaaseqartartoqalernissaanik eqqartueqatigiipput.

Aamma atuaruk Inatsimmi nutaami innarluuteqartut periarfissaqarnerulissapput

Aamma atuaruk Qaasuitsup: Maalaaruteqarniartut ilitsersorneqartarput

Naalagaaffiit Peqatigiit naapertorlugit Nunatsinni innarluutillit inuit allat assigalugit tusaaneqarnissaminnut pisinnaatitaaffeqarput.

Tassami innarluutillit atugaasa oqallisigineqarneri suli paqumigisaaqisut, Inge Olsvig Brandt isumaqarpoq.

- Tamatta, tamaavitta, inuiaqatigiinni inooqataasugut, innarluutillit ulluinnarni atugarisarigaat unammillerfigisaallu suuneri iluamik paasisariaqaratsigit.

Innarluutillillu oqaaseqartartuanik pilersitsinikkut innarluutit pillugit ilisimasat amerlanerulissasut, tappiitsut isigiarsuttullu peqatigiiffianni siulittaasoq isumaqarpoq.

Pisariaqartoq

- Innarluut suugaluarpalluunniit eqqartuileraangatta qaammaassakiffigivallaarpagut, taamaammat isumaqarpunga innarluutillit pillugit oqaaseqartartumik pilersitsineq iluaqutaalluarsinnaassasoq, ISI-mi siulittaasoq Hans Peter Larsen oqarpoq.

Nunarput inuit innarluutillit pisinnaatitaaffii pillugit Naalagaaffiit Peqatigiit isumaqatigiissutaannut naleqqussartussaavoq.

Naalakkersuisoq pilersitsiniartoq

Pisinnaatitaaffiillu pillugit siunnersuisoqatigiit isumaqarput, oqaaseqartartoqalernermikkut innarluutillit oqaatigiumasatik apuukkuminartinnerulissagaat, FN-imi isumaqatigiissummik naammassinninniarnissamut iluaqutaasussamik.

Isumaginninnermut naalakkersuisoq innarluutillit oqaaseqartartuanik pilersitsinissamut aappaagumut Aningaasanut Inatsisissami 2,5 millionit koruuninik illuartitsereerpoq.