Qaasuitsup: Maalaaruteqarniartut ilitsersorneqartarput

Isumaginninnikkut naammagittaalliuteqartarfiup innuttaasut isumaginninnikkut naammagittaalliorniarunik ilitsersuutinik amigaateqarneragaaneq Qaasuitsup kommuniata eqqunnginnerarpaa tunngavissaqannginnerarlugulu.

Allattoq Charlotte Holten-Møller

juulip 05-at 2016 16:08

Nutserisoq Erna Lynge

Naammagittaalliuteqartarfiup aarloqqutigaa kommunit innorluutilittatik pisussaaffimittut siunnersortarneraat, kommuniminnut qinnuteqaateqarunik itigartinneqarlutillu Isumaginninnikkut naammagittaalliuteqartarfimmut naammagittaalliorsinnaanerat pillugu, Naammagittaalliuteqartarfimmi siulittaasoq Naja Joelsen oqarpoq:

- Innarluutillit naammagittaalliutaannik suliat appariaateqarujussuarsimapput. Isumaqarpugut ilimagaluguluunniit innorluutillit itigartinneqarsimagunik naammagittaalliorsinnaanerminnik ilitsersuunneqartarsimanngitsut.

Aamma atuaruk Innuttaasut maalaaruteqarsinnaanermut siunnersorneqarneq ajortut

Kommunit sullissinermik 2011-mi tigusinerisa kingorna naammagittaalliutit apparsimanerinut peqqutaaneragaasoq, tassalu kommunit innuttaminnut naammagittaalliornissamut ilitsersuutinik tunniussisannginnerat Kommunimi avannaaniittumi isumaginninnikkut pisortap Henrik Soloy-ip eqqunnginnerarpaa.

- Isornartorsiuineq taanna ilisarisinnaanngilara. Allakkiat assigiissaartut uatsinni ingerlappagut, allakkiani, allakkani itigartitsissutinilu tamani naammagittaalliuteqarnissamut ilitsersuutit aalajangersimasumik ilaatittarpagut, Henrik Soloy erseqqissaavoq.

Akerlianik Henrik Soloyip naammagittaalliutit ikilisimanerat iluatitsilluarnermut ersiutiginerarpaa:

- Isumaqarpunga appariartoqarneranut peqqutaasoq illoqarfinni tamani sullissisoqaratta, innorluutillit angerlarsimaffiinut alakkartarpaat oqaloqatigalugit sutigullu ikiortariaqarnersut paasiniaaffigisarlugit. Tamanna takussutissaavoq Namminersorlutik Oqartussaninngaanniit kommunit suliassat ilaat suliarilluarnerusinnaammatigit, Qaasuitsup kommuniani isumaginninnermut pisortaq oqarpoq.

Kommunimi siunnersortaanerup tunualersup Dariuz Sobczynskip Isumaginninnikkut naammagittaalliuteqartarfik arriippallaamik sullissinerarlugu isornartorsiorpaa.

- Naammagittaalliuteqartarfik kommuninit suliassamik tigusigaangami ukioq ataaseq angullugu suliarisinnaasarpaa kommunimullu paasissutissanik pissarsiniarluni, Sobczynski taama allappoq - taanna Kommune kujallermi isumaginninnermi pisortanngortussaq - KNR-ip oqallittarfiani KNR.gl-imi taama oqaaseqaateqarpoq.