Meeqqat Ikiortigit, Red Barnet: Meeqqat innarluutillit sammineqarnerussapput

Meeqqat innarluutillit sammineqarnerusariaqartut kattuffiup oqatigaa, imaanngimmammi meeqqat tamarmik pisinnaatitaaffitik eqquutsinneqartutut misigisaraat. 

- Meeqqat innarluutillit pisinnaatitaaffitik eqquutsinneqanngikkaangata, ilaasa ajornartorsiutaat ajorseriarsinnaapput. Angajoqqaatik pisariaqartitaminnik tapersersorneqanngikkaangata peroriartornerlussinnaapput, ilaqutariinnut artorsartitsillutik, taamaalillunilu meeraq  innarluutilik arlaatigut innarlerluni. Meeqqat Ikiortigimmi, Red Barnetimi siulittaasoq Jonna Ketwa KNR-imut taama oqarpoq.

AAMMA ATUARUK Innarluutillit pisinnaatitaaffii sammineqarnerussapput

Innarluutillit ilinniagaqarsinnaanissamut periarfissaat sammineqarnerussapput

Meeqqat allat naligalugit meeqqat innarluutillit ilinniagaqarsinnaanissamut periarfissaat sammineqarnerusariaqartut, meeqqanut illersuinarluni kattuffik isumaqarpoq.

 - Innarluutillit piginnaasaqalernissamut, inuiaqatigiinnut tapertaanissamut inoqutigiinnilu isumalimmik peqataanissamut meeqqatulli allatuulli periarfissaqarput, taamallutik inuiaqatigiinni peqqissuuneq assigiinngiiaartuunerlu allisillugu.

Meeqqat 2012-imi illersuisortaarput, illersuisup meeqqat inuusuttullu pisinnaatitaaffii soqutigisailu siuarsaaqataaffigai.

Taamaammat Meeqqat Ikiortigit, Red Barnetip meeqqat innarluutillit illersuisortaarnerat, taakkulu sammineqarnerunissaat nuannaarutigaa. 

Illersuisut marluullutik suleqatigiilluarsinnaasut, Meeqqat Ikiortigit, Red Barnetip qularutiginngilaa.

- Kattullutik nunatsinni meeqqat innarluutillit aqqusaartagaat unammillernartut suunersut, tamakkualu qanoq iliuuseqarfigineqarsinaanersut erseqqissarsinnaavaat. Meeqqat Ikiortigimmi, Red Barnetimi siulittaasoq Jonna Ketwa taama oqarpoq.