Kommunimi allannguinissaq aningaasatigut naatsorsorneqanngitsoq
Kommune Qeqertalimmi politikkikkut allaffissornikkullu aqutseriaatsimik allannguisoqassaaq. Tassa ingerlatsiviit kommunini allani nalunnginneqartut atulerneqassapput.
Kommune Qeqertalimmi ataatsimiititaliat maanna sisamaannaapput, allannguinikkulli taakkua tallimanngortinniarneqarput.
Tamannali kommunimut inuttunngitsumut qanoq akeqassanersoq suli misissorneqanngilaq.
- Suliassaq siulleq suliassarput tassaassooq, aamma allannguiniarnitsinnut atatillugu aningaasaqarnitta tamakkiisumik qulaajaaffiginissaa, Siumup gruppiani siulittaasoq, Aqqa Samuelsen oqarpoq.
Tassalu kommunalbestyrelsi nutaassaaq ivertinneqarsimalereerpat allannguiniarneq qanoq akeqassanersoq aatsaat paasinarsissaaq.
Borgmesterissaq akisinnaanngitsoq
KNR-ip suleqatigiilersussat borgmesterissatut innersussaat, Siumumeersuni qinerneqarnerpaasoq, Aqqalu Reimer, kommunip allaffissornikkut aaqqissuussaanera pillugu siusinnerusukkut apersorpaa. Apeqqutilli taassuma nammineq atsiukkaminut tunngasut akisinnaanngilai, Aqqa Samuelsenimullu innersuussilluni.
Kommunimi aqutsisut nikinneranni kommunip aningaasaatai amerlanerulinngillat. Taamaattumik allannguinermi aningaasat pigineqareersuinnaat atorneqassapput.
- Naatsorsuutigivarput ingerlatsinermi aningaasaliissutaasartut, aningaasaliissutaasut iluini, allannguinissarput taanna siunnerfigivarput, Aqqa Samuelsen oqarpoq.
Pisortatut atorfiit qulingiluat
Kommune Qeqertalimmi ingerlatsinermut ukioq mannamut angusat 71 millionit koruuninik sinneqartoorfiunissaat missingersuutaavoq.
Allaffissornikkut aqutsinerup allanngornerani pisortatut atorfiit nutaat qulingiluat pilersinneqassapput. Tamanna kommunimut aningaasartornerunermik kinguneqassasoq Aqqa Samuelsenip nassuerutigaa, ajorinngilaali. Aqutseriaasermi maanna atuuttoq innutaasunut paasiuminaatsorujussuartut nalilerneqarpoq.
- Ajornartorsiuteqarunik ilaatigut sumut saaffiginnissallutilluunniit naluaat. Taanna allanngortikkusupparput aamma ingerlatsiviit siunertaasa ersarissarneratigut. Taavalu aamma paasiuminarsarneratigut, Aqqa Samuelsen oqarpoq.
