Kommuni nerisassat pillugit isornartorsiorneqarnerminut akissuteqartoq
Namminersorlutik Oqartussat suliffeqarfiit inuussutissaleriffiusut pillugit nalunaarutaat 1998-imeersoq isornartorsiuinerminni innersuussutigaat.
Tassani ilaatigut allaqqavoq:
- Kalaalimineerniarfinnit tuniniaaneq nunaminertami kommunalbestyrelsimit innersuussutigineqartumi taamaallaat ingerlanneqarsinnaavoq.
Kommunilu nalunaarummut naammassinnittoq, Kommuneqarfik Sermersuup ingerlatsinermut avatangiisinullu pisortaa Frank Rasmussen oqarpoq.
- Kalaalimineerniarfik nutaaq pisoqarlu atugassaritippagut, taakkulu nakkutigaagut, Frank Rasmussen oqarpoq, nangillunilu.
- Allani pisut kalaalimineerniarfinni tuniniaanerunngillat, tassalu Namminersorlutik Oqartussat nakkutigisassarai, kommuniunngitsup, Frank Rasmussen oqarpoq.
Taassuma inuussutissanik nakkutilliineq pillugu peqqussut 993-imeersoq innersuussutigaa, tassani allassimammat, Naalakkersuisut qitiusumik oqartussaasuusut oqartussaaffiullu ingerlanneqarneranut malittarisassiortussaasut.
AAMMA ATUARUK Brugsenip silataani nerisassanik tuniniaasarnerit oqartussanit unitsinneqalerput
Frank Rasmussen naapertorlugu inatsisit sorliit suliamut atuunnersut paasiniarlugu kommuni, politiit aamma Uumasunut Nakorsaqarfik Inuussutissalerinermullu Oqartussaaffik 2014-imi 2015-imilu ataatsimiittarput.
- Taakkunanilu inuussutissanut nakkutilliineq pillugu nalunaarut atuuttuusoq inerniliupparput. Nalunaarullu taanna atuuppat, taava nakkutilliisussaq ataasiuvoq, tassalu Namminersorlutik Oqartussat, Frank Rasmussen oqarpoq.
Aalisarnermut piniarnermullu naalakkersuisoqarfiup pisortaa, Jørgen Isak Olsen, ataatsimiinnerit taakku pillugit imaaliallaannarluni oqaaseqarsinnaanani KNR-imut allappoq.
AAMMA ATUARUK Brugsenip silataani nerisassanik tuniniaasarnerit oqartussanit unitsinneqalerput
Namminersorlutik Oqartussalli inatsisinik eqqortunik innersuussaqartut aalajangiusimavaa. Jørgen Isak Olsenili Nuummi Brugsenip silataani tuniniaanermut paatsuunganeq pillugu aaqqiissutissarsiorniarluni kommunimik ataatsimeeqateqarusuppoq.
- Oqartussat pissutsit taama ittut qanoq iliuuseqarfigisassaneraat pillugu paaseqatiissuteqarnissaq pisariaqarpoq. Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Kalaallit Nunaanni Aalisarnermut akuersissutinik Nakkutilliisoqarfik, politiit kommunillu suleqatigiillutik ajornartorsiummut aaqqiisariaqarput. Jørgen Isak Olsen KNR-imut mailikkut taama allappoq.
Kommunilu ajornartorsiutip aaqqiiviginissaanut suleqataarusuttoq, Frank Rasmussen oqarpoq.
