Brugsenip silataani nerisassanik tuniniaasarnerit oqartussanit unitsinneqalerput
Kalaallit Nunaanni uumasunut nakorsaqarfik inuussutissanillu nakkutiginnittoqarfik kalaallit nunaann aalisarnermut nakkutilliisoqarfik peqatigalugu misissuimmata Nuummi Brugsenip silataani tuniniaasoqartarnera maluginiarsimavaat. Aamma tuniniaasinnaanermut akuersissuteqanngitsut tuniniaasarneri paasisimanerarpaat.
Pissutsit tamakku Uumasut nakorsaqarfik inuussutissanillu nakkutiginnittoqarfimmi immikkoortortami pisortap Egill Steingrimssonip isornartoqartippai.
- Kommuneqarfik Sermersuup ilami kommuneqarfiit sinnerini taamatut akuersissuteqaratik Brugsenip silataani nerisassanik tuniniaasoqartarnera inerteqqutaagaluartoq tuniniaasartunut tamanna erseqqissaasoqartannginnera isornartoqarteqaara. Namminersorlutik Oqartussat inuussutissat pillugit inatsisaat atuuttut naapertorlugit tamanna inerteqqutaagaluarpoq, Egill Steingrimsson oqarpoq.
AAMMA ATUARUK Nuummi Kalaaliaqqap amigartooruterpassuani ajornartorsiutigai
Tuniniaasartummi sumiiffinni ilaatigut biilit pujoorfigineqartartuniittarput qimmillu angalaannartut aqqusaartagaaniimmata nerisassanik tuniniaaviusinnaasussaanngikkaluartulluunniit Namminersorlutik Oqartussanit tikkuartuunneqarpoq.
Aalisarnermut Piniarnermullu Naalakkersuisoqarfimmi pisortaq Jørgen Isak Olsen Egill Steingrimssonituulli assisugusumik mamiatsaqqavoq, ilaatigut kommunit ajornartorsiummut akersuutinnginneri naammaginagit.
Taamaalilluni nerisassanik tuniniaaviit akuersissuteqaratik tuniniaasarfiusut Uumasut nakorsaqarfimmit inuussutissanillu nakkutilliisoqarfimmit nakkutigineqarnerulernissaat maanna naatsorsuutigineqarsinnaalerpoq.
AAMMA ATUARUK Politiit: Facebookikkut imigassamik tuniniaaneq inerteqqutaavoq
