Kommunerujussuaq pitsaaquteqarpoq

Qaasuitsup Kommuniani borgmesterip tulliata aappaa isumaqarpoq maannakkutut kommuunit avinneqarsimanerat pitsaaquteqartoq pitsaanerulersinnaasorlu.

Qaasuitsup Kommuniata minnerpaamik kommunenut marlunnut avinneqarnissaanik siunnersuut Inuit Ataqatigiit isumaqatiginngilaat.

Maannakkutut kommuunit aggorneqarsimanerannik isornartorsiuisut isumaqarput kommunet arfineq pingasut kommuuni ataasinngortillugit Qaasuitsup Kommuniata pilersinneqarnerani demokrati kinguariarsimasoq. Suliniaqatigiiffik Aasiaat pillugut suleqatigiiffik isumaqarpoq Kangaatsiaq, Aasiaat, Qeqertarsuaq Qasigiannguillu immikkut kommuuninngortariaqartut. Ilanngullugu siunnersuutigaat Ilulissat, Uummannaq, Upernavik aamma Qaanaaq immikkut kommuuninngussasut. Suliniaqatigiiffik isumaqarpoq taamaasiornikkut demokrati nukittorsarneqarsinnaasoq.

Inuit Ataqatigiilli imaasiallaannarlutik ilalersinnaanngillat kommuunip nutaamik aggornissaa. Qaasuitsup Kommuniani borgmesterip tulliata aappaa Bent B. Kristiansen isumaqarpoq, kommuunip ajornartorsiorneranut pissutaasut ilagigaat ajornartorsiutitoqqat kommuunitoqqanit kingornunnneqarsimammata.

- Kommuunit kattutsinneqarneranni siunertat ilagaat innuttaasut assigiinnerusumik sullinneqarnissaat aningaartuutikillisaanerlu. Kommuunit kattunnerisa kingorna aatsaat taama assigiinngitsigisumik innuttaasut sullinneqalerput, Bent B. Kristiansen oqarpoq.

Taanna isumaqarpoq kommuunip aningaasatigut ajortorsiornera ilaatigut pissuteqartoq akiliisitsiniartarnerup akileraarutinillu nalimmassaasarnerup allanngortinneqarnerannik tassuuna kommuunip karsia aningaasarpassuarnik amigaateqalermat.

- Kisianni eqqaamasariaqarparput Qaasuitsup Kommuniani ingerlatsinermut aningaasartuutit 2011-mi 95 millioner koruunit angullugit annikillinikuummata, Bent B. Kristiansen maannakkutut kommunet aggorneqarsimanerannik illersuisoq oqarpoq.

Taanna isumaqarpoq kommunet maannakkutut aggorneranni ukiuni marlunni atuussimalersumi pitsaaqutit saqquminerulissaqqaartut.

- Uggornarporli kommunalbestyrelsep aporfiit iluarsiiviginiarlugi iliuusaasa assigiinngitsut inerititaqalernissaat qinikkanit ataasiakkaanit naammagittarluni utaqqerusunneqanngimmat, Bent B. Kristiansen oqarpoq.

Kommunep aggoqqissinnaanera oqaluuserineqartussat ilagaat Qaasuitsup Kommuniani kommunalbestyrelse pingasunngorneq novembarip 23-at ataatsimiilerpat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl