Kommunet ileqqut qanganitsat suli malikkaat
Taamaaliortoqanngilarli. Taarsiullugu kommunit arlaqartut ileqqoreqqusatoqqat ingerlatiinnarsimavaat; ilaasalu suli atorlugit.
Naalakkersuisut siulittaasuata allaffeqarfiata inatsisinut immikkoortortaqarfiata inatsisit allattorsimaffii nalunaarutillu misissortillugit siorna paasivaat, kommunit pillugit ileqqoreqqusat kommunit 2009-mi iluarsartuuteqqinnginneranneersuusut atorneqarsinnaanngitsut.
Aamma atuaruk Kommuni inatsit qangarnisaasut atuutsinneqarneri ajornartorsiutaavoq
Taamaattumik taakku siorna septemparimi tusagassiuutinut nalunaaruteqarput, kommunit tamakku iliuuseqarfigissagaat.
Qaasuitsup Kommunia, Qeqqata Kommunia, Kommuneqarfik Sermersooq aamma Kommune Kujalleq pissutsit aaqqinnissaannut ukioq manna martsip naaneranut periarfissinneqarput.
Pilersaarutigineqarporlu ileqqoreqqusat kommunit iluarsartuuteqqinnginneranni atsiorneqarsimasut tamarmik allattorsimaffinniit piiarneqassasut.
Maanna iluarsiinissamut piffissarititaasoq qaangiutereerpoq kommunillu sulinerat suli naammassineqarani.
- Suliarivaammi. Piffissaritaasorli martsip 31-at qaangiutereeraluartoq suli naammassisoqanngitsoq, Naalakkersuisut siulittaasuata allaffeqarfiani pisortaagallartoq Søren Hald Møller oqaluttuarpoq.
Taanna suliamut tunngasumut attuumassuteqarsimanngilaq, ukioq manna aatsaat pisortanngorallarami.
Naalakkersuisoqarfimmili inatsisinut immikkoortortaqarfik attavigisimavaa. Taakkulu nalunaarput kommunit suliatik ukioq manna naammassissallugit naatsorsuutigigaat.
- Ima paasivara, kommunit suliaq naammassiniarsarigaat - kommunit malittarisassatoqaasa akuersissutigeqqinnissaannut imaluunniit atorunnaarsinnissaannut, anguniarneqartorlu aasartinnagu suliap naammassinissaa, Søren Hald Møller oqarpoq.
Kommunilli kinguuaattoornerat kinguneqartinneqarnavianngilaq.
- Uannut pingaarnerpaavoq, kommunit suliaminnik naammassinninnissaat. Oqareernertullu nuannaarutigaara kommunit suliamik naammassinninnissaminnik ilungersuuteqarmata, Søren Hald Møller oqarpoq.
Piffissarititaasoq allannguuteqarmat Naalakkersuisut siulittaasuata allaffeqarfiani ileqqoreqqusat kommunit allanngortiterneqannginnerata siornaneersut nalunaarsuiffinni assigiinngitsuniit piiarnianngikkallarpaat. Pilersaarutigisimagaluarpaat apriilip aallaqqaataani taamaaliorniarlutik.
