Kommuni inatsit qangarnisaasut atuutsinneqarneri ajornartorsiutaavoq
Piniartup unnerluunneqarsinnaannginneranut pissutaavoq, Sisimiut kommunerisimasaani, Kangerlussuarmi aamma Maniitsup kommunerisimasaani, qamutit motoorillit atorlugit piniarsinnaanermut peqqussut suli atuummat, Qeqqata Kommuneanut atuunnani.
Qanga kommuniusimasunut peqqussutit arlalissuit maanna suli atuutsinneqarneri ajornartorsiutaavoq. Taama oqarpoq vicepolitimesteri, Morten Nielsen.
- Kommunit nutaat pilersinneqarneranni inatsisinik nutaanik peqqussusiortoqarsimannginnerata kinguneraa, inatsisit tunngavigalugit unnerluussisinnaanissap ajornartorsiutaanera. Taamaattumik inatsisinik unioqqutitsisoqarsimatillugu pisut ataasiakkaat nalilersortariaqartarpagut aamma komunalbestyrelse imaluunniit oqartussaqarfiit allat paasiniaavigisariaqarlutigit inatsisit atuutsinneqartut kommunini nutaani atuutsinneqarnersut.
Vicepolitimesteri, Morten Nielsen oqarpoq.
Inatsisit imaluunniit peqqussutit sorliit kommuninut nutaanut atuutsinneqarnersut ilisimaneqanngivissorpoq.
- Kommunini peqqussutit atuuttut, Kalaallit Nunaanni qitiusumik inatsisit allattorsimaffianni nassaariniartarneri ajornartorsiutaavoq. Taamaattumik sulinerput naammassiuminaattarpoq taamaattumillu kommunini oqartussat attavigeqattaarneqartarlutik, peqqussutit sorliit atuutsinneqarnerasut paasiniarneqarneranni, Morten Nielsen oqarpoq.
Taassuma aamma oqaatigaa, unnerluussisut inatsisinik immikkuualuttunik atuisarneri inuit ilaannit paasiuminaatsinneqassappat tupiginagu.
- Innuttaasut ilaannit tusarneqarsimassappat, unnerluussisut inatsisit immikkuualuttortaannik teknikkioqisunik atuivallaartarneri tamanna paasisinnaalluarpara. Kisianni tassa inatsisilerituut suleriaasiat taamaappoq, tamannalu innuttaasunit paasiuminaatsinneqarpat oqarsinnaavunga, inatsisit immikkualuttut pisariaqarluinnartuusarmata, Morten Nielsen oqarpoq.
Takornartaanngilaq inuit inatsisinik qangarnisanik unioqqutitsisut unnerluunneqarsinnaaneq ajormata. Soorlu assersuutigalugu inuk illoqarfiup iluani aallaammik silaannarmut eqqaassisup unnerluunneqarsinnaanera ajornartorsiutaasinnaalluni. Politiilli ileqqoreqqusaliornerisa kingorna tamanna allanngortinneqarpoq eqqaassisut aningaasanik akiligassinneqartalersillugit.
- Qanoq iliuutsit arlaqartut, sumiiffinni ataasiakkaani sukumiisumik naleqqussarneqartartut inatsisinik naliginnaasunik malitseqartinneqartarput. Taamaattumik oqartoqarsinnaanngilaq inatsisinik atorsinnaasunik nassaarneq ajortugut, vicepolitimesteri, Morten Nielsen oqarpoq.
Namminersorlutik Oqartussat Pinngortitaq pillugu immikkoortortaqarfiani pisortaq, Martin Schiøtz oqarpoq, illoqarfiit avataanni qamutit motorilli atorlugit angallanneq eqqarsaatigalugu peqqussusiortoqalersoq, tamannalu nunamut tamarmut atuutissasoq oqaatigalugu. Taamaaliornikkut anguniarneqarluni soorlu Maniitsumi, Sisimiuni aamma Kangerlussuarmi inatsisinik nutaanngitsunik atuineq atorunnaarsinneqassalluni.
