Kommuneqarfik Sermersuup aningaasaliissutissat isumaqatigiissutigigai
Kommuneqarfik Sermersuumi borgmesteri Charlotte Ludvigsen Asii Chemnits Narupip issiavikuaniilernerminiit siullermeerluni ukiumut missingersuusiornermi isumaqatigiissusiorpoq. 2020-mut missingersuutit isumaqatigiissutigineqartut Demokraatinik Suleqatigiissitsisuniillu taperserneqarput.
AAMMA ATUARUK Toqqaannartoq: Asii Chemnitz Narup borgmesteritut tunuareerpoq -Charlotte Ludvigsen borgmesterinngorpoq
Tassunga tunngatillugu borgmesteri oqaloqatigeqqammerpara aperaaralu isumaqatigiissummi suna nuannaarutiginerpaaneraa
- Isumaqatigiissut atsiorneqartoq nuannaarutigisorujussuuarput, ingammik meeqqanut ilaqutariinnullu aningaasanik sipaarniartoqassanngitsoq. Taassumalu iluani tamakkiisumik ilaqutariinnut ikiorsiinissamut siunnerfeqarluta isumaqatigiikkatta. Ilaqutariinnullu illoqarfinni pisariaqartitsisuni susassaqartitsinissamut aaqqissuussisinnaaneq.
Kommuneqarfik Sermersuumi borgmesteri, Charlotte Ludvigsen oqarpoq, nangillunilu
Tunumi interneti pitsaanerusoq
- Aamma Tasiilami internetimut attaveqaatip pitsanngorsaaviginissaa aalajangiupparput. Systeminut tunngatillugu suleqatigiinneq eqaannerulerlunilu pitsaanerulernissaa anguniarlugu. Soorunami aamma innuttaasunut pitsaanerusumik attaveqaateqartitserusulluta aalajangiupparput
Tasiilami internetip pitsanngorsarnissaanut satelitsimut attaveqaat 16 mbitimiit 200 mbitimut qaffanneqassaaq. Pilersaarut malillugu attaveqaat 2020 qiteqqunnerani atuutilereersimassaaq. Attaveqaammut pitsanngorsaanissamik kommunip Telepostillu isumaqatigiissutaannut aningaasartuutissap annerpaaq telemit akilerneqassaaq.
AAMMA ATUARUK Asii Chemnitz Narup - isumaginninnermut siunnersortimiit nuannarineqaqaluni borgmesterimut
Aningaasat meeqqanut tunngasunut atugassat tunimilu internetimut attaveqaammut tunngasut saniatigut isumaqatigiissummi aamma allaqqavoq aningaasat 15 procentii sanaartornermut atorneqassasut. Ilaatigut Tasiilami illuaqqanik paaqqinnittarfinniit atorneqartartussanik sanaartortoqassaaq, anartarfiit kuuffiinik erngullu aqqutaannik sanaartornermut aningaasat atorneqassapput Nuummilu atuarfinnik utoqqaallu illuannik sanaartortoqassalluni.
