Kommuneqarfik Sermersuumi innuttaasut sisamat 2024-mi ilungersuussilluartutut nersornaaserneqartut
Kommuneqarfik Sermersuumi innuttaasut sisamat ukiup ingerlanerani ilungersuussilluartutut ukioq 2024 qaangiummat ataqqinaaserneqarput.
Ilungersuussilluartut sisamat tamarmik immikkut najukkaminni ajunngitsuliorsimasut nersornaaserneqartut, kommune nersornaasiinermut tunngavilersuutitut allappoq.
Max Autibert Tiileqilaameersoq ilaatigut nersornaaserneqarpoq.
Taanna atuarfimmi aqutsisuuvoq, taannalu sunngiffimmini qaannamik kultureqarnerup attanneqarnissaa sulissutigaa, suliaqarnerminilu meeqqanut inersimasunullu ataatsimoorfimmik immikkuullarissumik pilersitsisimasoq, Kommuneqarfik Sermersooq nittartakkamini allappoq.
Ittoqqortoormiini ilungersuussilluartumik aamma nersornaasiisoqarpoq. Gudmund Josvassenip nammineq kajumissutsiminik suliaqarnermini meeqqat inuusuttullu qimussimik sukkaniuunnermik ilinniarnissaannik pilersitsisimavoq.
Taassuma suliaqarnera ‘kinguaariit ataatsimoornerannik inerneqarput aamma illoqarfiup kulturikkut kinaassusianut pitsanngorsaaqataasoq’ kommune allappoq.
Ataatsimooqatigiinnermik pilersitsisoq
Ittoqqortoormiinit Paamiunut Andrine Jensenip najugaqarfigisaanut. Taanna juullip orpianik ikitsinermik, nereqatigiinnermillu suliniuteqarpoq.
Taassuma nammineq kajumissutsiminik suliaqarnera illoqarfimmi ataatsimoornermik ataqatigiinnermillu pilersitivoq, innuttaasummi immikkut ikiortariaqartut tapersersorpai. Taamaammat ilungersuussilluartutut nersornaaserneqarpoq.
Nersornaat kingulleq illoqarfiit pingaarnersaanni innuttaasumut Nukaaraq Berglundimut tunniunneqarpoq, taassuma illoqarfimmi angerlarsimaffeqanngitsunut juullimut aaqqissuussinerit ilaatigut suliarai. Taanna piffissami artornarsinnaagaluartumi kialaarnermik nuannaarnermillu pilersitsisoq, kommune allappoq.
