Mimi Karlsen kuultimik nersornaaserneqartoq
Kuultiusumik nersornaasiisoqartarnera qaqutigoorpoq. Mimi Karlsenili Nuummi Hans Egedep Illuani nalliuttorsiornermi sapaatip akunnerani matumani nersornaaserneqarpoq. Inatsisartunit tusagassiuutinut nalunaarummi allassimavoq.
Mimi Karlsenip Inatsisartuni siulittaasutut sinniisussaa Kristian Jeremiassen oqalugiarnertalimmik nersornaasiisuuvoq.
- Mimi Karlsen, inuuninni ukiorpassuarni tunniusimallutit naalakkersuinikkut suliaqarnerit aammalu Inatsisartut siulittaasuattut atuunnerit pissutigalugit Inatsisartut Siulittaasoqarfiata kuultiusumik Nersornaaserpaatit, Kristian Jeremiassen oqarpoq.
Perorsaanermik tunuliaqutaqarnera iluaqutaasoq
Kristian Jeremiassenip oqalugiarnermini Mimi Karlsenip politikkikkut suliaqarnera Inatsisartunut 2009-mi qinigaaneranit aallartissimasoq – tamatumalu kingorna naalakkersuisuni arlaleriarluni ilaatigut kultureqarnerup, peqqinnissaqarnerup, isumaginninnerup naligiissitaanerullu iluani ilaasortaasimalluni.
Mimi Karlsenilu siunnersuisoqatigiinni arlalinni ilaasortaasimavoq, Maniitsumi kommunalbestyrelsimut ilaasortaasimavoq piffissamilu aamma borgmesterimut tullersortaasimalluni. Mimi Karlsen ilinniartitsisutut ilinniarsimasuuvoq, tamannalu politikkikkut suliaqarnermini iluaqutigilluartarsimallugu.
- Naalakkersuinikkut suliaqarninni perorsaasutut misilittakkatit annertuumik isumassarsiorfigisarpatit, taakkulu naalakkersuinikkut suliaqarnermi aqutsinikkut atortorissallugit pisut ilaanni iluaqutigilluarsinnaasarlugit, Kristian Jeremiassen oqarpoq, Mimi Karlsenillu peqatigiiffilerinermi sunngiffimmilu inuunermi sammisaqartarsimanera aamma erseqqissaatigalugu.
- Inatsisartunut Siulittaasutut naalakkersuinikkut sulininni isumaqatigiissitsiniarneq aammalu Inatsisartut suliaat pillugit naalakkersuinikkut soqutigisat assigiinngitsorpassuit katersuuffiunissaat anguniartuarpat, taanna oqarpoq, nangillunilu:
- Naalakkersuinikkut ingerlatsininni pisimasut iliuuserisimasatillu annertuut naalakkersuinikkut sulininni tunniusimalluinnarninnut minnerunngitsumillu piumassuseqarninnut takussutissaapput, tamannalu kuultiusumik Nersornaasernikkut siulittaasoqarfiup annertuumik qujaniarneranut ersiutaavoq.
Politikki suliffittut allatulli ittoq
Mimi Karlsen nuannaartoq qujaniartorlu takkuttunut qujassuteqarluni oqalugiarnissamut periarfissaqartinneqarpoq:
- Qujanaq Inatsisartut siulittaasuinut, inatsisartunut. Ilaquttat, nunaqqatit, inuit atugaat pitsanngortinniarlugit suliassaqartuaannarpoq, suliarigaannilu iluaqutaaneri takullugit pilluaataajuaannarluni, taassuma oqalugiarnini aallarnerpaa.
Peroriartorpunga suliaqartuaannartut akornanni. Taakkuttaaq piumaffiginnittuaannarput suliaqarnissamik, taannalu uannut sunniuteqarsimaqaaq. Politikkikkut sulineq suliffittulli allatut isigaara. Inuit ikiugassat, ataqqisassat, atukkallu pitsanngortinniagassat suliarisarlugit. Nersorneqarnissaq qummulluunniit isigineqarnissaq pingaartinnagu, Mimi Karlsen oqarpoq.
Nersornaat Inatsisartut nersornaasiisarneranni annerpaavoq, taannalu nunatsinni innuttaasunut nunanilu allamiunut nunatsinni innuttaasunut, inuussutissarsiornermi, eqqumiitsuliornermi ilisimatusarnermiluunniit immikkut ittumik iliuuseqarsimasunut tunniunneqartarpoq.
