Rebekka Olsvig Nuummeersoq sølviusumik Nersornaaserneqartoq

Rebekka Olsvig Nuummeersoq Nuummi Hans Egedep Illuani tallimanngormat nalliuttorsiutigineqarpoq.

Nalliuttorsiulaarneq Inatsisartut siulittaasuata Mimi Karlsenip sølvimik nersornaasiineranik pissuteqarpoq. Nersornaaserneqartorlu Inatsisartut siulittaasuannit kusanartunik oqaaseqarfigineqarpoq.

Siulittaasoqarfik tusagassiuutinut nalunaarummi allappoq.

Rebekka Olsvigip takornarianut ilaatigut tikilluaqqusilluni kalaallit qanoq inooriaaseqarnerannik nittarsaassivigisarsimagai tamannalu taamaalilluni nunarsuarmioqatitsinnit ilisimaneqalersimasoq, Mimi Karlsenip erseqqissaatigaa.

Qasusuillunilu isummersuisoq

Siulittaasorlu ima oqarpoq:

- Suliassaqartitsinermi annertuumik piumassuseqartuunerit inuppassuarnit nuannaartorineqartarpoq, inuttullu allanngujaatsutut, inuiaqatigiinnilu allanngueqataanissannut piumassuseqarluartutut, alapernaatsutullu ilisarisimaneqarputit.

- Ukiorpassuarni qasusuilluinnarlutit aalisartut piniartullu taamatullu ilaqutariit pissakinnerusut uummateqarfigalugit sullissimavatit, soorlu aamma pissusissamisuuginnartoq inuiaqatigiinnik sullisserusunnerit ingerlatiinnarit.

Rebekka Olsvigillu annertuumik akuusimanera aamma erseqqissaatigineqarpoq, amerlangaarmatali taagorneqarnissaannut piffissaqartoqarunarani.

Rebekka Olsvigip nersornaat pissarsiarisani pigiuarsinnaavaa.