Kommuneqarfik Sermersooq Kommuninik nakkutilliisoqarfimmut misissoqqeqquaat
Taamaattumillu Kommuneqarfik Sermersuup KANUKOKA-mit ilaasortaajunnaarnerani inatsisinik unioqqutitsisoqarsimanersoq ikinnerussuteqartut misissoqqeqquaat.
Kommuneqarfik Sermersuumi kommunalbestyrelsimi Siumuup Atassutillu ilaasortaatitaasa qulingiluat, Peter Davidsen siuttoralugu isornartorsiuisuupput.
Aamma atuaruk Kommuninik Nakkutilliisoqarfimmi ilaasortat nutarterneqartut
Kommunip borgmesteriata, Asii Chemnitz Narupip, Inuit Ataqatigiinneersup kommunit kattuffiannit ilaasortaajunnaarnerup aningaasatigut allaffissornikkullu kingunissai qulaaj arsimanngikkai, kommunillu 2016-imut aningaasanut missingersuusiorneranut ilanngussimanngikai, ikinnerussuteqartut isumaqarput.
- Kommunit namminersortuunerannut inatsit kommunip unioqqutissimagaa, Peter Davidsen isumaqarpoq, nangillunilu:
- KANUKOKA-mit aninermut tunngatillugu nalunnginnatsigu KANUKOKA-mi nalilimmik piginneqataassuserput anigutta annaasussaallugu, taannalu 10-15 millionit tungaannut kukkuallaarunanngilanga naleqarami, tamakkua qulaajarneqarnikuunnginnamik.
Aamma atuaruk Kommuninik nakkutilliisoqarfik uninngaannarpoq
- Taamaammat taakku tunngavigalugit Kommuninik nakkutilliisoqarfimmut ingerlateqqikkusunnikuuarput. Kisianni ajoraluartumik paasivarput Kommuninik nakkutilliisoqarfik atorsimanngitsoq ukiuni pingasuni, taamaammat ernumassuteqarluta ilaatigut taamatut nalunaarpugut tusagaassiutinut, Peter Davidsen oqarpoq.
Namminersorlutik Oqartussat nunami namminermi pissutsinut allaffeqarfiani - Kommuninik nakkutilliisoqarfiup allaffeqarfigisaani - ikinnerussuteqartut siuliakkiutigisaannik suliarinninnerminni unioqqutitsisoqarsimannginneranik inerniliisoqareersoq, Peter Davidsenip nassuerutigaa.
- Nunamut namminermut allaffissornikkut taanna aalajangerneqarsimarpaluppoq taamatut. Taava soorunami taakku uppernarsarsinnaappassuk KANUKOKA-miit aninermut aningaasartuuteqarsimanngitsugut, taavalu aningaasanik annaasaqarsimanngitsugut, taavalu allaffissornikkut misilittakkatigullu allatigullu avitseqatigiinnernut suleriaqqinnissatsinnut uppernarsaatissaqartut takussutissaqarlutillu, taava ajorinnngilarput akuerikutsoorsinnaavarput, Peter Davidsen naggasiivoq.
