NEQEROORTITSINEQ Kommuninik nakkutilliisoqarfik uninngaannarpoq
Nakkutilliisoqarfik 2013-imi nutaamik siulittaasortaarmalli ataasiarluniluunniit ataatsimiiffiusimanngitsoq, Kommuninik nakkutilliisoqarfiup siulittaasua Solja Ólavsstovu ilisimatitsivoq.
- Siulittaasunngoramali naapeqqinngilagut, Solja Ólavsstovu oqarpoq.
- Ilisimasakka naapertorlugit, Kommuninik nakkutilliisoqarfimmi ilaasortat ukiuni pingasuni sisamani naapissimannginnerat naliginnaasuunngilaq. Aamma suliassanik tunngaviusumik pingaarutilinnik Nakkutilliisoqarfimmit qaqinneqartariaqartunik suliassaqarnersoq apeqqutiginikuuara. Taamaattoqarsimagunanngilarli, Solja Ólavsstovu, Kommuninik nakkutilliisoqarfimmi siulittaasutut Nunatta Eqqartuussisuuneranit 2013-imi toqqarneqartoq taama oqarpoq.
Taassuma saniatigut kikkut Kommuninik nakkutilliisoqarfimmi ilaasortaanersut ilisimaneqaqqissaarneqanngilaq.
Ilaasortaalluni naluaa
Ilaasortat KANUKOKA-meersut marluk suli toqqarneqarsimanngillat.
Aamma ilaasortat marluk Inatsisartunit toqqarneqartut aappaat, borgmesteriusimasoq inatsisartunullu naalakkersuisunullu ilaasortaasimasoq Ruth Heilmann oqaloqatigigatsigu Kommuninik nakkutilliisoqarfimmi ilaasortaalluni naluaa:
- Ilaasortaanngilanga. Ilaasortaaninnik ilisimatinneqarnikuunngilanga. Aamma aggersarneqarnikuunngilanga, Ruth Heilmann taama oqarpoq.
Taamaammat Kommuninik nakkutilliisoqarfik piffissami sivittajaami tamakkiisumik ingerlasinnaasimanngitsoq, Namminersornerullutik Oqartussani pisortaasimasup Solja Ólavsstovup nassuerutigaa:
- Nakkutilliisoqarfiup allattoqarfia taamaalilluni pisoqarfiuallaarsimanngilaq. Kommuninik nakkutilliisoqarfik piffissap ilaani uninngaannarsimasutut oqartoqarsinnaavoq, Solja Ólavsstovu oqarpoq.
Aatsaat suliassaqartinneqartussanngorpasippoq
Kommuninik nakkutilliisoqarfik ukiuni kingullerni pingasuni aatsaat suliassaqartinneqartussanngorpasippoq.
KNR-imiimmi oqaluttuareriikkatsitut Sulisitsisut peqatigiiffiata GE-p Kommuneqarfik Sermersooq aamma Qaasuitsup Kommunia Kommuninik nakkutilliisoqarfimmut ataasinngormat suliassanngortippai, kommunit taakku marluk pisiortugassaminnik neqeroortitsisimannginnerat pissutigalugu.
Kommuninik nakkutilliisoqarfiup allattoqarfiata Naalakkersuisut siulittaasuata naalakkersuisoqarfiata ataaniittup GE-p suliassanngortitaanik maanna misissuileruttortoq allattoqarfimmit ilisimatitsissutigineqarpoq.
Allattoqarfiup nalilissavaa suliaq ima ilungersunartiginersoq Kommuninik nakkutilliisoqarfimmit isummerfigineqartariaqassanersoq.
Ruth Heilmannip Nunami namminermi pissutsinut allaffeqarfik attavigisimavaa, Kommuninillu nakkutilliisoqarfimmi apriilip aallartinnerani ataatsimiittoqarnissaa naatsorsuutigineqarpoq.
