Kommuneqarfik Sermersooq attanneqarsinnaasumik ingerlatsineq pillugu isornartorsiorneqartupilussuaq

Nuuk attanneqarsinnaasumik ingerlasutut taassallugu tunngavissaqanngilaq.

DR Detektorip Nuuk illoqarfiit pingaarnersaanni siullersaalluni attanneqarsinnaasumik ilumut ingerlatsisuunersoq paasiniarlugu ilisimatuut arlallit apersugai taama ersaritsigisumik oqarput.

Apeqqut taanna aamma KNR-imit akissutissarsiniarnikuuarput.

AAMMA ATUARUK Kommune Nuummik nunarsuarmi illoqarfiit pingaarnersaanni siullersaalluni piujuaannartitsisumik nalunaarusiortitsoq

Kommunip pissanganarsaarivallaarsimaneq nassuerutigigaa

Ilisimatuut Detektorip oqaloqatigisaasa nalunaarusiaq Nuup nunarsuarmi illoqarfiit pingaarnersaanni siullersaalluni attanneqarsinnaasumik ingerlatsisutut taaneqarneranut tunngaviliisoq misissorpaat.

Nalunaarusiami inerniliinernut tunngaviit paasiuminaattut nalunaarusiarlu amigaateqartoq ilisimatuut isornartorsiuutigaat. Assersuutigalugu Nuuk illoqarfinnut sorlernut sanilliunneqarnersoq, attanneqarsinnaasumillu ingerlatsinermik oqarnermi suna pineqarnersoq takuneqarsinnaanngilaq.

Isornartorsiutillu ilaat Kommuneqarfik Sermersuup inuussutissarsiornermut pisortaata Emil Skjervedalip akueraa.

- Tusagassiuutinut nalunaarutigut pissanganarsarpallaalaarsimavagut. Taakkulu kingusinnerusukkut saqqummerseqqissinnaaniassagatsigit ullumi aaqqissorpagut, Emil Skjervedal oqarpoq

Suna peerpisiuk?

- Qulequtai allanngortippagut. Ilaatigut Nuuk nunat illoqarfiisa pingaanersaasa attanneqarsinnaasumik ingerlasutut unammineranni peqataasumik allaqqasoq allanngortipparput, taavalu Nuup nunarsuarmi illoqarfiit pingaarnersaasa sinneri attanneqarsinaasumik ingerlatsinerup uuttortarnerini ajugaaffigigai allaqqasoq allanngortillugu.

Sooruna allanngortippisigit?

- Eqqunngimmata, Emil Skjervedal oqarpoq.

Suliffeqarfik EarthCheck nalunaarusiortuuvoq, nalunaarusiarlu taanna Kommuneqarfik Sermersuup tusagassiuutinut nalunaarutiminut pineqartunut tunngavigaa.

AAMMA ATUARUK Nuuk illoqarfiit pingaarnersaanni takornariaqarnermi piujuartitsisut nunarsuaarmi siullersaalluni akuerisaasoq

Kommunip EarthCheck suliakkittuuvaa, nalunaarusiornermullu akiliilluni attanneqarsinnaasumillu takornariarfittut uppernarsaateqaannarniaruni ukiumut 50.000 koruuninit amerlanerulaartunik akilertassallugit.

EarthCheckimik suleqateqaannarniartut

Nunatsinni Danmarkimilu ilisimatuut isornartorsiuigaluartut, Kommuneqarfik Sermersuup EarthCheck suleqatigiinnarusuppaa.

- EarthCheckip suleqatigiinnarnissaa naatsorsuutigilluinnarparput, Emil Skjervedal oqarpoq.

EarthCheck suliffeqarfittut tatigisaasoq, suliffeqarfiullu suliaa Nuup attanneqarsinnaasumik ingerlaleriartornissaanut ikiutaasoq ilaatigut innersuussutigaa.

EarthCheckimut sianeraanni hollandimiup paatsiveerusimaartup oqarasuaat tigussavaa

KNR Detektorilu EarthChecimeersumit isornartorsiutit pillugit apersuiniarsarigaluarput. Detektorip suliffeqarfik e-mailikkut allaqatigaa, misissuinernili suut tunngavigineqarnersut akissutissarsisinnaasimanagu.

KNR-imit EarthCheck attaviginiarsarigatsigu manna Hollandimiittumik paatsiveerusimaartumik naggataatigut attaveqarpugut, taannali suliffeqarfimmi suliunnaarsimagami ikiorsinnaanngilaatigut.

Aamma Kommuneqarfik Sermersuup ammanerusumik ingerlatsineq EarthCheckimik oqaloqatigiissutiginiarpaa.

- Tassani misissugassaqarluinnarpugut, EarthCheckimillu suleqateqarnitsinnut atatillugu aaqqitassaqarpugut, Emil Skjervedal oqarpoq.00:00:19

Inerniliinernut nalilersuinermilu tunngaviit erseqqinnerunissaannik piumasaqarniarnerlutik aperineqarami ima akivoq.

- Misissueqqaarnanga maannakkut neriorsuuteqarsinnaanngilanga. Taanna nalilersortussaavarput. EarthCheck oqaloqatiginiarparput, KNR-imiillu apersorneqarnissaminnut periarfissiinissaat neriuutigisorujussuuara, Kommuneqarfik Sermersuup inuussutissarsiornermut pisortaa Emil Skjervedal oqarpoq.

Kommuneqarfik Sermersooq KNR-ip akissutissarsiorniarluni EarthCheckimik attaveqarnissaanut ikiutaaniarluni neriorsuivoq.

Detektorip aallakaatitaa dr.dk-kkut tusarnaarsinnaavat.