Kommune Nuummik nunarsuarmi illoqarfiit pingaarnersaanni siullersaalluni piujuaannartitsisumik nalunaarusiortitsoq

"Nuuk nunarsuatsinni siullersaalluni illoqarfiit pingaarnersaattut piujuartitsisunngorpoq".

Kommuneqarfik Sermersooq taama qulequtsiilluni aggustip qaammataa naajartulersoq tusagassiuutitigut nalunaarusiorpoq.

Komuneqarfik Sermersuup suliffeqarfik ’EarthCheck’ akilerlugu nalunaarusiassamik suliakkippaa. Nalunaarusiamilu Nuuk tassaanerarneqarpoq nunarsuarmi siullersaalluni illoqarfiit pingaarnersaattut piujuartitsisoq.

Illoqarfiit pingaarnerit EarthCheck-imiit misissorneqartuni Nuuk kisiartaanersoq, kommunimiit akineqarsinnaanngilaq.

Nuuk piujuartitsisuuneranut misissuinermi Nuuk ataatsimoortillugu uuttortarneqartoq, EarthCheck naliliivoq. Misissuinermilu uuttuutit assigiinngitsut pingasut tassa, aningaasaqarneq, silap pissusaa, avatangiisit kulturi isumaginninnerlu atorneqarlutik. Taamaaliornikkut pinerluttulerineq, suliffissaaleqineq, eqqakkanik isumaginninneq, imeqarniarneq, silaanarmik aniatitsinerit isiginiarneqarlutik.

Suliakkiut imissutaarpasissoq

Nuuk nunarsuatsinni siullersaalluni illoqarfiit pingaarnersaattut piujuartitsisunngornissaanik kommunip allannera sinnattuaqiinarnerunerpa? Kommunip taama imminut suaarutiginera pillugu immikkut ilinniarsimasunut pingasunut nalunaarusiaq atuartipparput taamatullu suaarutiginninneq inissaminiinersoq naliliisillugit.

Illoqarfimmi piujuartitsinermut tunngatillugu qisuariaataat siulleq alutorinninnerunngilaq.

- Uani nalunaarusiaq suliakkiissutaasoq pineqarpoq. Soorlu aamma takornarialerineq eqqarsaatigalugu illoqarfik pilerinarsagaasutut ippoq, Ilisimatusarfimmi inuunnik isumaginninnermut immikkoortortami pisortaq Steven Arnfjord oqarpoq.

Nalunaarusiaq naapertorlugu Nuuk taamaammat piujuartitsisuuvoq: 

- Immikkoortunit 15-init aqqaneq-marlunni Nuuk illoqarfinnit allanit ajunnginnerusumik inissisimavoq

- Nuup erngup nukinganik, imernik eqqagassanik imikoorummillu isumaginnilluarpoq

Nalunaarut naapertorlugu Nuuk ukunani piujuartitsinermik pitsanngorsaasariaqarpoq: 

- 15-init pingasuni Nuuk illoqarfinnit allanit ingerlalluannginneruvoq

- Taamaammat Nuup silaannarmut aniatitsinini annikillisassavaa, nakuusertoqartarneri ikilisassavai illoqarfimmilu mingutsitsisoqannginnerulersillugu

Paasissutissarsiffik: Benchmarking assessment report, EarthCheck

- Pissusilersorluarluta nuannaariarta, tassami sorpassuit uuttortarneqanngillat, pitsanngorsagassallu amerlaqalutik, Ilisimatusarfimmi inuiaqatigiilerinermi ilisimatooq Birger Poppel oqarpoq.

”Nunarsuatsinni siullersaalluni illoqarfiit pingaarnersaanni piujuartitsisumi”
CO2-mik aniatitsineq annertusoq

EarthCheckip nalunaarusiaa atuaraanni Nuummi sisamanik pitsaaquteqartoq atuarneqarsinnaavoq. Kisiannili aamma pitsaanngilluinnartoqarpoq. Soorlu illoqarfinnut allanut sanilliullugu Nuummi innuttaasut ukiut tamarluinnaasa CO2-mik aniatitsinerujussuusarput.  

Tamatumani assigiinngitsunik nassuiaatissaqartoq, Birger Poppel isumaqarpoq.

- Bussit dieselitortuupput, takornarsiartaassuillu trawlerillu illoqarfimmut pisartut ikummatissamik atuisuupput, taakkulu CO2-mik annertuumik aniatitsisuullutik. Tamatuma saniatigut ikummatissanut akigitinneqartut nunarsuarmi akigitinneqartunut sanilliullugu appasinnerujussuulluni.

Nuummi innuttaasut inuiaqatigiit killerpiaanni inuusut

Inunnik isumaginninnermut tunngatillugu aamma pitsanngorsagassaqarpoq.

Tillinniat, toqutsinerit, suliffissaaleqineq nalunaarusiami sammineqarput, kisianni angerlarsimaffeqannginneq, imminut toquttoqartarnera, inissaqarniarnermullu tunngasut ilaatinneqanngillat. Nalunaarusiaq ataatsimut isigalugu isumaginninnermut tunngasunik amigartoq, Ilisimatusarfimmeersoq Steven Arnfjord isumaqarpoq:

- Nuuk marloqiusamik avinneqarpoq, innuttaasut pigissaartut kiisalu innuttaasut isertitakitsuaqqat. Piujuartitsinissaq annertusiniaraanni inuiaqatigiinni assigiinnginnerujussuaq nalimmassarneqartariaqarpoq, ilisimatooq oqarpoq, itisiliillunilu:

- Ineqarneq eqqarsaatigalugu ineriartorneq equngasorujussuuvoq, taamatullu innuttaasut inuiaqatigiit killerpiaanni inuullutik. Innuttaasut taakku nalunaarusiami tikinneqanngillat.

Erngup nukinga assersuutissaqqissoq

Nalunaarusiap imarinerpaartarisai tassaapput avatangiisinut tunngasut silallu pissusaa. Tassani Nuuk inissisimalluarpoq. Silaanarippoq imerlu pitsaasuulluni. Nuuk erngup nukinga eqqarsaatigalugu immikkuullarissoq, Pinngortitaleriffimmi Avatangiisinut aatsitassanullu immikkoortortaqarfimmi aqutsisoq Josephine Nymand isumaqarpoq.

- Nuuk Nunarsuarmi illoqarfiit pingaarnersaanut sanilliullugu immikkuullarequtigaa illoqarfik erngup nukinganik sarfamik kiassarnermillu pilersorneqarmat. Illuatungaanilu tikkuarneqarsinnaasoq tassaavoq imeq maangaannartussaq salinneqarani kangerlummut iginneqartarmat. Nuummullu tunngatillugu pinngortitamut sunniuteqarneq ajorpoq.  

Nuuk nunarsuarmi sumiiffia eqqarsaatigalugu, innuttaasukinneralu pissutaalluni imeq maangaannartarnera assersuutissaqqippoq. Taamatummi piujuaannartitsinertut ajornanngitsunnguamik pointit pissarsiarivai. Illoqarfinnimi allani pointit annikitsuinnaat pissarsiarisarpaat:

- Illoqarfik eqqagassanik isumagineqarnera pointerpassuarnik pissarsissutigigaa assersuutigisinnaavarput. Eqqakkammi nunanut allanut nassiunnagit ikuallanneratigut kiassarnermut atorneqartarput, Josephine Nymand nassuiaavoq.

Piujuartitsineq takornarianik soqutigineqarluartartoq

Nuuk nunarsuatsinni siullersaalluni illoqarfiit pingaarnersaattut piujuartitsisunngornera pillugu kommunip usorsitsaarinera, tunngavia annikippallaartoq immikkut ilisimasallit pingasuusut tamarmik isumaqatigiissutigaat. Nalunaarusiarli naleqanngilluinnartutut nalilinngilaat, tassami EarthCheck-imit nersugaaneq illoqarfimmi takornarianik soqutiginnilersitsisarmat:

- Illoqarfik taama naqissuserneqarnera takornariaqarneq eqqarsaatigalugu illoqarfimmut iluaqutaassasoq isumaqarpunga, Josephine Nymand oqarpoq.

Taamatullu Inuaqatigiilerinermut ilisimatusartup Birger Poppel isumaqarpoq. Aammali kommuni siumut isigaluni pitsaanerusumik iliuuseqarnissaa nalunaarusiap tikkuussai anguneqarnissaat kissaatigaa.

- Qaqqat imerlu uagutsinnut tunniussaareerput. Illoqarfilli qanoq piujuartinnissaa angusinnaanerlugu qiviartariaqalerparput.  

Nuuk nunarsuatsinni siullersaalluni illoqarfiit pingaarnersaattut piujuartitsisutut taaneqarnera sumik tunngaveqarnersoq Kommuneqarfik Sermersuummut apeqqutigaarput. Kiisalu nunarsuarmi illoqarfiit pingaarnerit allat EarthCheck-imiit misissorneqarsimanersut apeqqutigaarput. Sapaatip akunnerata tulliani akissuteqarumaarlutik Kommuneqarfik Sermersooq allappoq.