Naalakkersuisut Kuannersuarni aatsitassarsiornissamik suliniut akerleriissutaasoq pillugu innuttaasunik ataatsimiititsinissaminni kujataani innuttaasunik toqqissiviilliortitsiumanatik peqataassanngillat.

Inuussutissarsiornermut aatsitassanullu naalakkersuisoq, Jens Frederik Nielsen (D), imminut sinnerluni taavalu Kim Kielsen Jess Svanelu, ataatsimiinnerni aamma najuuttussaagaluartut sinnerlugit, marlunngormat taama nasuiaavoq.

AAMMA ATUARUK Jens Frederik Nielsen: Innuttaasut pillugit innuttaasunut ataatsimiititsinernut peqataanianngilagut

Taamali nassuiaaneq kommunalbesyyurelsimut ilasortat marluk nuimasut ilisarisinnaanngilaat. Siumut sinnerlugu kommunalbestyrelsimut ilaasortaq Narsami najugalik, Karla E. Bisgaard, ima oqarpoq:

- Una politimesterip oqaatigereerpaa: Aarlerinanngilaq. Maanngartoqarpat aarlerinassanngitsoq neriuppunga, taanna oqarpoq.

Jens Frederik Nielsenip oqaatigaa, Nalakkersuisut kujataanut tikissappata innuttaasut toqqissiveeerutilissasut. Tamanna illit ilisarisinnaaviuk?

- Uanga naatsorsuutiginngilara taama ajortigisumik pisoqassasoq. Qulequttat allat pineqaraangata naalakkersuisunik tikittoqartuartarpoq, aamma nalunngisakka malillugit ataatsimiinnerit eqqissisimasumik ingerlanneqartarput.

Inuit naapinnissaat pisussaaafiusoq

Karla E. Bisgaard paarlattuanik isumaqarpoq, Kim Kielsen, Jess Svane aamma Jens Frederik Nielsen najuuppata tamanna innuttaasunik ataatsimiinnerit pitsaaqutigissagaat.

- Soorunami Naalakkersuisut inissisimaffiat pingaartorujussuummat, innuttaasutut ataasiakkaarluta oqariartuutitta pimoorullugu tiguneqarnissaat naatsorsuutigissagipput qularutissaaangilaq. 

Kommunimi borgmesterimut tullersortaasumut tulliusoq, IA-meersoq Henrik Brummerstedt taamatukanneq aamma oqarpoq. Naalakkersuisut ataatsimiinnerni peqataallutik inunnut toqqannartumik qiviarnissamut pisussaasut, taanna isumaqarpoq.

- Uanga aqqusinermi naammattuuivunga atsiornernik katersisunik aatsitassarsiornissamut tunngatillugu. Aammalu aqqusinermi naapitakka arlallit oqariartuutigivaat ingasattoq sulisitsisut peqataanatik tusarniaanermi innuttaasunillu naapisitsinermi ingerlatsisoqassappat. Taava suna suliariniarsarissagamikku, atorfilittatik innuttaasunik oqaloqatiginnereersut? 

AAMMA ATUARUK Kuannersuit pillugit Narsami Qaqortumilu innuttaasunik ataatsimiisitsinissat amerlineqartut

Naalakkersuisut atorfilittatik aallartiinnarnagit namminneq takkullutik ataatsimeeqataallutik aatsitassarsiorfik pillugu tunngavilersuigunik toqqissinartuliornerussasut , taanna isumaqarpoq.

- Toqqissisimanarnerusarpoq sulisitsisoq oqaloqatigalugu imaanngitsoq sulisitsisut sulisuat kisiat oqaloqatigalugu.