Kuannersuit pillugit Narsami Qaqortumilu innuttaasunik ataatsimiisitsinissat amerlineqartut
Kuannersuarni aatsitassarsiulersaarneq pillugu Qaqortumi Narsamilu innuttaasunik ataatsimiisitsinissat amerlineqassasut, Naalakkersuisut aalajangerput.
Qaqortumi innuttaasunik ataasinngornermi februaarip ulluisa arfineq-pingajuanni marloriarluni ataatsimiisitsisoqassaaq, siulleq ualikkut nalunaaqutaq marluniit tallimanut qiteqqunnerata tungaanut pissalluni.
Tullia unnukkut nalunaaqutaq arfineq-marluniit qulingiluanut qiteqqunnerata tungaanut pissaaq.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Narsami innuttaasunik aamma marloriarluni ataatsimiisitsisoqassaaq, Qaqortumi innuttaasunik ataatsimiisitsisoqaleruttornerani aamma pisussanik.
Illoqarfinni marlunni taakkunani innuttaasunik ataasiaannarluni ataatsimiisitsisoqarnissaa pilersaarutaasimagaluartoq, ataatsimiisitsinissalli innuttaasut kikkulluunniit peqataasinnaaqqullugit amerlineqartut, aatsitassanut naalakkersuisoqarfimmi pisortaq Jørgen Hammeken-Holm oqarpoq.
Tassami inimi ataatsimi isersimasinnaasut affaannaat coronavirusi pillugu malittarisassat peqqutaallutik iseqqusaapput:
- Aammali innuttaasut sapinngisamik amerlanerpaartaat peqataasinnaaqqullugit taamaaliorpugut, taanna KNR-imut oqarpoq.
Namminersorlutik Oqartussat Qaqortumi Narsamilu innuttaasunik ataatsimiisitsinerit internertikkut toqqaannartumik aallakaatinneqassangatippaat.
Kujataani innutaasunik ataatsimiisitsinissat Narsarsuarmi tallimanngorpat aallarnerneqassapput. Qassiarsummi, Igalikumi, Qaqortumi naggataatigullu Narsami tamatuma kingorna aamma ataatsimiisitsisoqassalluni.
Innuttaasunik ataatsimiisitsinissat qaqugu sumilu pinissaasa allattorsimaffiat uani takusinnaavat:
Naalakkersuisut qaartartumeerinissamik sioorasaarneqartut
Innuttaasunik ataatsimiisitsinissat oqallisaaqaat.
Naalakkersuisunut ataasiakkaanut qaartartumeerinissamik sioorasaarisoqarnera peqqutigalugu innuttaasunik ataatsimiisitsinerni najuukkusunnatik, inuussutissarsiornermut aatsitassanullu naalakkersuisoq Jens-Frederik Nielsen (D) sapaatit akunnerata siuliani tallimanngornermi nalunaarpoq.
Naalakkersuisullu aalajangiussimapput. Taamaammat Namminersorlutik Oqartussani atorfilittat aatsitassarsioqatigiiffillu Greenland Mineralsimeersut innuttaasunik ataatsimiisitsinerni najuutissapput.
AAMMA ATUARUK Jens Frederik Nielsen: Innuttaasut pillugit innuttaasunut ataatsimiititsinernut peqataanianngilagut
Naalakkersuisut innuttaasunik kingusinnerusukkut ataatsimiisitsinerni peqataassangapput.
Innuttaasunik ataatsimiisitsinissat kinguarteqquneqartut
Siumup aatsitassarsiulersaarnermut ukiorpaalunni tapersersuigaluarluni innuttaasunik ataatsimiisitsinissat kinguartinneqassasut, Siumumi siulersuisuunerit sapaatit-akunnerata siuliani siunnersuutigaat.
- Tassa taamatut kissaateqarpunga ullumikkut peqqussutit atuuttut aammalu innuttaasut katersuussinnaanerani killilersuutit piuneranni, takusinnaavara innuttaasut tamarmik periarfissinneqarnavianngittut tusarniaanerani ingerlanneqarnerani peqataanissaminnik, Siumup siulittaasuanut tullersorti Vivian Motzfeldt KNR-imut sapaatit-akunnerata siuliani oqarpoq.
Peqatigiiffiit, innuttaasut sumiiffimmilu politikerit arlallit ataatsimiinnerit kinguartinneqarnissaat kissaatigaat. Inuit ataatsimiinnerni peqataasinnaasut corona peqqutigalugu killilersuinernit killilerneqaqqanerat ilaatigut pissutaasoq, tunngavilersuutigineqarpoq.
Inuit illup iluani katersuuttut 100-nit amerlaneroqqusaanngillat.
