Kommune kujalleq tukkorpallaarpoq

- Akileraarutip procentimik ataatsimik qaffanneqarnissaa pinavianngilaq, tamanna periarfissatut kingullerpaatut isigaarput, Kommune Kujallermi borgmesteri Simon Simonsen KNRimut oqarpoq.

Kommune kujallermi aningaasaqarniarneq iluarsiiviginiarlugu Kommuneqarfiit nakkutilliisoqarfiata ilaatigut siunnersuutigaa sullissinermut akigititat qaffanneqarsinnaasut aammalu kommunemut akileraarut procentimik ataatsimik qaffanneqarsinnaasoq.

Aammattaaq tikkuarneqarpoq Kommune Kujallermi qinikkat aningaasanik tunioraanissaq tunuarsimaarfigisariaqaraat.

- Tassani pineqarpoq aningaasartuutigineqartartut aningaassaliiffigisartakkavullu, sukanganerusumik nalilersuiffigineqartalertariaqartut. Uagut aningaasakillioraluarluta, isumaginninnerup iluani aningaasartuutit, uagut pisussaaffiginngikkaluakkatta ilaat, aningaasartuutigisaratsigit. Tassalu tamakku sukateriffiginerusariaqarlugit paasivarput paasigatsigu kommunenut allanut sanilliulluta isumaginninnikkut aningaasartuuteqarnerulluta, Simon Simonsen oqarpoq.

Namminersorlutik Oqartussat inatsisaat malillugu ukiup naanerani, kommunip ukiumut isertittagaasa 5 procentit tigoriaannaatigineqassasoq. Tamanna Kommune Kujallermi ukiuni kingullerni marlunni malinneqarsimanngilaq.

- Ukiuni kingullerni aningaasartuutigeriataartakkavut amerlapput, taamaasilluta missingersuutitsinni eqquutsitsinngitsoortarluta. Taamaasilluta karsitsinniitussaagaluit 5 procentit ataatsilaartarsimavagut, soorlu 3,5 procenti 4 procentilluuniit nalaaniitarlutik, Simon Simonsen oqarpoq.

Kommune Kujallermi borgmesterip Simon Simonsenip oqaatigaattaaq, aningaasaqarniarnerup 2013-imiit ilorraap tungaanut aallarnissaa naatsorsuutigineqassasoq.