Qaqortoq Kollegiat ukiut arlallit qaangiuppata piariissapput

Qaqortumi illoqarfittaami blok F-ip tunngavigisimasaani  ilinniartut najugaqarfiinik sanaartornissaq pilersaarusiorneqarpoq.  

Pilersaarutit tamarmik iluatsissappata ilinniartut najugaqarfissaat taakkua ilaat ilaqutariinnut naleqqussakkat ukiut arlaqanngitsut qaangiuppata illoqarfittaami napparneqassapput

Ilinniartut najugaqarfissaat illussanik titartaasartunit TNT-meersunit Inuplan-imeersunillu titartarneqarput.

Ilinniartut ilaat inissaaleqissunneqartarmata Ilinniartut najugaqarfiini sullissisup Jakob Noahsenip  sanaartortoqalernissaa qilanaaraa, inissiaatileqatigiiffinnummi attartortoqartarpoq.    

AAMMA ATUARUK Ilinniartunut inissianik sanaartortoqalersoq

- Sanaartornissamut pilersaarummi piffissaq siulleq uani eqqartorneqarpoq. Tamannalu ukioq manna ukiulluunniit tulliani aallartinneqarsinnaassaaq. Taakkua Jaakup eqqartoriigaatut ilinniartunut ilaqutaqartunut inissiaasussaassapput. Najugaqarfiit 15-iniit 20-inut amerlassuseqassapput, siornatigut inissiap isaterneqarsimasup Blok F-ip toqqavikuani, tasersuup eqqaani, Ebbe Nielsen oqarpoq.

Iliniartunulli ilaqutaqartunut inissiat sanaartorneqartussat naammassineqareerpata tassani aamma ilinniartunut 18-liineqanngitsunut sanaartornissat tullinnguuttussasut, niuernermut ilinniarfimmi pisortaq oqarpoq, - sanaartornerup immikkoortuata aappaani ilinniartunut 18-it ataallugit ukiulinnut inissanik sanaartortoqassaaq,  aallaqqaammulli ilimagaarput tassani ilinniartut 50-it najugaqarsinnaassasut, Henrik Ebbe Nielsen oqarpoq.  

AAMMA ATUARUK Ilinniartut ineqarfii nungullarsimallutillu oqoqartut

Ilinniartut ilaqutallit, taakua inissaqartinniarlugit INI A/S-imut attartortariaqartaratta, Noahsen oqarpoq.

Qaqortumi ilinniartut najugaqarfii 280-iupput. Taakkualu saniatigut ineqarfiit 15-it INI A/S-imut attartorneqartariaqarsimallutik.

-Taakkua init angisuujugamik, tassa aamma nalinginnaasumik akisupput, angisuujunerat pissutaalluni, Jakob Noahsen oqarpoq.

Taamaammat ilinniartut najugaqarfiinik sanaartornissaq Qaqortumi ilinnigaqartunut sullissisup nukinginnartuusoraa.

-Nukinginnarpoq. Tassami naammaginannginnami INI A/S-ip inaataani ilinniartunik najugaqartitsineq, Noahsen oqarpoq.

Qaqortumi illoqarfittaami blok F-ip inissisimaffigisimasaani ilinniartunut inissialiornissanut pilersaarutit kittaarlugit ingerlanniarneqarput, Qaqortumi niuernermut ilinniarfiani pisortaq Henrik Ebbe Nielsen oqarpoq. oq.

Taakkualu Qaqortumi kollegiani najugaqartunut sullissisumit qilanaarineqalereerput,

-tassa qilanaaqaagut. Sivisuumik utaqqisimavagut taakua. Massakkullu piviusunngornissaat qanillivoq. Pissanganarpoq qaqugu naammassineqassanersut, Jakob Leander Noahsen oqarpoq. 

Illoqarfinni ilinniarfeqarfiusuni allani ilinniartunut inissianik sanaartornissat aamma pilersaarusiorneqaleruttorput