QAQORTOQ Ilinniartut ineqarfii nungullarsimallutillu oqoqartut
Taammaammat kollegiat pisoqalisimaqisut, oqummillu eqqugaaqqasut SIK-ip inuusuttaasa misissuiffigisimavaat. Iluarsagassarpassuaqartorlu paasinarsivoq.
Qaqortumi sulisartut højskoliata ilinniartunut ineqarfiutaanni ineeqqat 84-iusut akornanni ineeqqat 34-t massakkut atorsinnaangitsut pisoqalisimaqaat.
Perorsaasunngorniaq Berthe Ane Hansen ineeqqami taama ittumi najugaqarnikuuvoq.
-Tujorminarpoq iserlugu silaannaluttoq. Ineeqqat ingammik. Ineeraq oquttaqarsimagami silaannalulluni meeqqanut peqqinnarnani, Berthe Ane Hansen taama oqarpoq.
Ilinniagaqartut SIK-ip inuusuttaanut aamma ilaasortaasinnaammata ilinniartut najugaqarfiinik misissuisoqarpoq.
- Kollegienut tunngasut ukiup siulianili suliaralugit ingerlappagut misissuiffigalugillu, Ineeqqallu allat aamma oqoqaqisut paasineqartoq, SIK-p inuusuttaani siulittaasoq Dorthinnguaq Brønlund taama oqarpoq.
Ineeqqat oqoqarnerat ilaatigut pissutaalluni atuanngitsuukulasoqartartoq, siulittaasoq isumaqarpoq.
- Kollegieni najugarisatik pissutigalugit atuanngitsuukulasartut, imaluunniit meeqqamik napparsimatitsikulasarneq atuanngitsoornermut ilaasarami, Illoqarfinnilu ilinniartoqarfiusuni kollegiet pisoqalisimaqisut piaartumik iluarsaattariaqarnerat SIK-p inuusuttaasa politikerinut apuutereersimanerarpaat.
- Maani Qaqortumi inissaagalugit atorneqanngitsut amerlapput. Taavalu aamma nunatsinni sineriammi kollegiet suli ajortut. Soorlu Ilinniartunulluunniit inissaqqinngikkaluartut suli atorneqarnerat suaarutiginiarlugit saaffiginnippugut, SIK-p inuusuttaani siulittaasoq Dorthinnguaq Brønlund taama oqarpoq.
Illoqarfinni ilinniartoqarfiusuni kollegieliornissat Naalakkersuisuniit maanna pilersaarusiorneqarpoq. Qanorli tulleriiaarisoqassanersoq suli saqqummiunneqarsinnaangikallarpoq, Ilinniartitaanermut naalakkersuisoq Doris Jakobsen KNR-imut ilisimatsitsivoq.
