Kofoeds Skole Nuummi immikkoortortaassaaq
Danmarkimi inooqataaniarnermikkut ajornartorsiuteqartut atuartinnissaannik ikiorserneqarnissaannillu atuarfiup neqeroorfigisarpai, maannalu Nuummi illoqarfiup qiterpasissuani inimik attartugassarsisimalluni.
Danmarkimi Kofoeds Skolep pisortaa Robert Olsen oqaluttuarpoq, inuit angerlarsimaffeqanngitsut, atornerluisut allatigullu inooqataaniarnermikkut ajornartorsiuteqartut 70-80-it missaanniittut ikiorserneqarsinnaajumaartut.
- Ikiorseeriaatsit assigiinngitsut atorlugit inuit imminnut ikiorsinnaanngortinniartarpavut. Tunngavigisarparput inuit namminneq tunniussaqarnermikkut ingerlariaqqinnissaat. Atuarfimmilu Nuummiittussami soorunami aamma taamatut ingerlaaseqassaagut, pisortaq oqarpoq.
Aamma atuaruk VIDEO Kofoeds Skole Nuummi ammaassaaq
Immikkoortortaqarfimmi Nuummiittussami isumaginninnermik siunnersorteqassaaq, igaffimmi pisortaqarluni marlunnillu sammisassaqartitsisoqassalluni. Taakku decembarip aallartinnginnerani inuttassarsiuunneqassapput.
Kofoeds Skolep aqutsisussaatut Allison Hansen oktobarip aallaqqaataanit atorfinitsinneqarsimavoq. Taanna Kommuneqarfik Sermersuumi isumaginninnermi immikkoortortami pisortatut sulisimavoq, maanilu ukiuni qulini kingullerni najugaqarsimasuulluni.
Nuummi Kofoeds Skolep immikkoortortassaa danskit aningaasaateqarfiisa assigiinngitsut aningaasaliinerisigut piviusunngorsinnaalersimavoq.