Københavnimi Arktisk Festivalertitsisussat: Kalaallit Nunaat oqallisaaqaaq

Arktisk Festival 2023 Illu Atlantikumi sapaatit akunnerata naanerani aallartissaaq. Aaqqissuussaq taanna soqutigineqaleraluttuinnartoq, aaqqissuisut oqarput.

Allattoq Hanna Vestergaard Hviid

novembarip 04-at 2023 11:03

Nutserisoq Hanne Petersen

Københavnimiittut Kalaallit Nunaannik Issittumillu soqutigisallit Arktisk Festival 2023-mut novembarip ulluisa sisamaanni tallimaannilu alakkaasinnaapput.

Arktisk Festival 2023 Københavnimi Illu Atlantikumi pissaaq, tassanilu saqqummiisoqassaaq, oqalugiartoqassaaq saqqummersitsisoqassallunilu.

- Issittoq oqallisaaqaaq, aamma Kalaallit Nunaat. Sillimaniarnermut, takornariaqarnermut silallu pissusiata allanngoriartorneranut tunngasuni pisoqarfioqimmata oqallisaaqaat. Taamaammat ukioq manna Arktisk Festivalertitsinissarput taakkuninnga soqutigisalinnut sammisumik aaqqissuupparput.

- Ingammik Kalaallit Nunaat soqutigineqaqaaq, Kalaallit Nunaata Københavnimi sinniisoqarfianeersoq Arktisk Festivalimillu aaqqissueqataasoq Kim Falck-Petersen oqarpoq.

Ilaatigut nipilersortoqassaaq, oqalugiartoqassaaq, ingerlaaqatigiittoqassaaq allanillu pisoqassalluni. Soorlu Maya Sialuk Jacobsen naggueqatigiit inuit kakiorneri pillugit oqalugiassaaq. Aamma Christian Ulloriaq Jeppesen kinaassuseq pillugu podcastimik tusarnaagassiani pillugu oqalugiassaaq.

Kalaallisoornermik minutsini 20-ni ilinniarneq

Aamma kalaallisoornermik ilinniarneq Det Arktiske Husimi aliikkuersuinernut ilaassaaq.

Soorlu 'aluu, 'tikilluarit', qujanarsuaq', 'kutaa', 'qanoq akeqarpa?' 'qanoq akeqarpa' aamma 'qassinngorpa?' kalaallisoornermik ilinniartitsissutigineqartussanut ilaasut, Kim Falck-Petersen oqarpoq’

- Kalaallisut oqaatsit taakkua kalaallisoornermik ilinniartitsinermi aallarniutissaqqittutut isigaavut.

ARKTISK FESTIVALIMIK AAQQISSUISUT KIKKUUPPAT?

Ukuupput: Illu Atlantiku, Danmarkimi peqatigiiffik Det Grønlandske Selskab, angalatitsivik Arctic Friend, Københavns Universitetip Kalaallit Nunaat Issittorlu pillugit immikkoortortaa, Arktisk Institut, Polarbiblioteket, Savalimmut sinniisoqarfiat, nunatta sinniisoqarfia Islandillu aallartitaqarfia, aamma Visit Greenland taavalu Royal Greenland aningaasaliisuupput. Tamatuma sianiatigut Issittoq pillugu kattuffinneersorpaaluit Arktisk Festimvalimut alakkaasunut ilaasarput.

Københavnip qeqqani Kongelige Grønlandske Handels Pladsimi Arktisk Festivalertoqartarpoq. Kongelige Grønlandske Handels Plads Danmarkip aamma Atlantikup Avannaani nunat ukiuni kingullerni 200-ni attaveqatigiinnerannut qitiuvoq. Quersuatoqqat marluk, tassa Illu Atlantiku aamma Det Arktiske Hus tassaniipput.

Arktisk Festivalimut alakkaaneq akeqanngilaq.

Allisiguk

4000-t alakkaasut

2019-imi siullerpaamik Arktisk Festivalertitsisoqarpoq. Coronavirusi nunarsuarmi tamatuma kingorna tuniluummat 2020-mi Arktisk Festivalertoqanngilaq. Illu Atlantikumili siorna ulluni marlunni Arktisk Festivalertoqarmat alakkaasut 4000-ngajaapput.

Ukioq manna alakkaasut amerlanerussasut aaqqissuisut ilimagaat.

- Arktisk Festivalimik soqutiginnittut amerliartuinnavipput, Illu Atlantikumullu sapinngisamik alakkaasoqarluarsinnaaqqullugu ukioq manna Atlantisk Festivalernissamut aaqqissuussinerput pisarnermit ataqatigiissaarluarnerusariaqarsimavarput, Kim Falck-Petersen oqarpoq.

Qallunaat, kalaallit, Kalaallit Nunaannik soqutigisallit, ilisimatusartut taavalu politikerit aallartitallu Danmarkimeersut nunatsinneersut ilinniarnertuunngorniallu ukioq manna Arktisk Festivalimut alakkaasussanut ilaasut, taanna aamma oqarpoq.

- Kalaallit Nunaat oqallisaaginnarnani aammali Issittorlu soqutigineqarneruleraluttuinnartut malunnarpoq.

Arktisk Festivalimut alakkaaneq akeqanngilaq. Ukioq manna pisussat ima aaqqissuunneqarput.

Nutaarsiassami kukkunermik nassaarsimaguit uunga allaffigineqarsinnaavugut.