Knud Mathiassen Naleqqami ilaasortaajunnaarsinneqartoq

- Naalagaaffinngorutta danskit nunatsinniit angerlakassapput.

Politikeri Knud Mathiassen piviusulersaarummik ‘Grønlands hvide guld’-imik oqallisaangaatsiartumik isiginnaagaqareernermi kingorna Sermitsiami ilanngutassiami taama oqarpoq.

Taamalu oqaaseqarnera tassunga akisuvoq. Taannami Naleqqami siulersuisut sisamanngornermi unnukkut ilaasortaajunnaarsitsiniarlutik aalajangernerata kingunerisaanik partiimi ilaasortaaffeqarunnaarpoq. Tamannalu ingerlaannartumik atuutilerpoq.

Partii tusagassiuutinut sisamanngornermi unnukkut allappoq.

Akuersaanngilluinnaraat

Oqaaseqaatigineqartut ‘partiip tunngaviusumik naleqartitaanut aamma nunarput pillugu takorluugaanut akerliusut’, partiillu nunatsinni innuttaasut tamarmik, sumi inunngorsimanerat apeqqutaatinnagu ataqqinissaat tunngavigigaa partii tusagassiuutinut nalunaarummi allappoq.  

Taamaammat ammip qalipaataanik innuttaasunilluunniit eqimattaanik immikkoortitsisumik oqaaseqarneq partiip akuersaanngilluinnaraa, partii allappoq.

- Naleqqap tamaviaarutigaa nunatta Naalagaaffinngornissaa, tassanilu tamanut peqataatitsinissaq inuiaqatigiitsinnullu akuutitsinissaq qitiuvoq. Pisariaqartipparput Naalagaaffinngornissamut aqqut eqqortumik pilersaarusiorneqarlunilu naapertuuttuunissaa, inuit pisinnaatitaaffii aamma nunat tamalaat inatsisaat ataqqillugit. Kalaallit Nunaata ataqqinassusianik ataatsimoortariaqarnitsinnullu innarliinissamik oqariartuuteqarnissaq inissaqanngilaq, Siulittaasoq Pele Broberg tusagassiuutinut nalunaarummi allappoq.

Naleraq Knud Mathiassenimik ilaasortaajunnaartitsisuni siulliunngilaq. IA-p taanna 2023-mi apriilimi aamma ilaasortaajunnaarsippaa. Tamanna paniminut nakuusersimasutut unnerluutigineqarneranik pissuteqarpoq – suliamullu tassunga atatillugu eqqartuussiveqarfimmit aamma Nunatta Eqqartuussisuuneqarfianit pinngitsuutinneqarpoq. Kisianni IA aamma Knud Mathiassen assigiinngitsumik anguniagaqarnerat pissutaasoq, Agathe Fontain KNR-imut 2024-mi januaarimi oqarpoq.