KNR-ip pisortaanera atorfimminit tunuarpoq

Jacob Abelsen KNR-imi pisortaanertut atorfimminit sapaatit-akunnerata matuma naaneranit atuutilersumik tunuarpoq.

Allattoq Camilla Dam

oktobarip 20-at 2015 11:37

Nutserisoq Simon Uldum -

Sivisuumik isumaliutigereerlugu sapaatiummat taama aalajangersimalluni Jacob Abelsenip sulisunik ataatsimiititsinermi oqaatigaa.

Jacob Abelsen maajip aallaqqaataani pisortatut sulilerpoq taamaalillunilu ukiup affaannaani sulilluni. Taamaattoq Jacob Abelsen KNR-imut attaveqaannassaaq 2016-imi januaarip naanerata tungaanut.

Aamma atuaruk KNR Jacob Abelsen KNR-imi pisortatut atorfinitsinneqassaaq

- Misigivunga KNR-ip avataani suliat allat ingerlateqqittariaqarlugit, pisortaanertut atorfimminit tunuartoq taama oqarpoq.

- Suliassaq ilinnut annertuallaarsimava?

- Taama misigisimanngilanga. Isumaqarpunga sorpassuartigut angusaqarsimalluta. Assersuutigalugu Nunatsinni tusagassiuutit allat qanittumik suleqatiginissaat, aviisit aammalu radioqarfiit tv-qarfiillu, aammalu suliniutit arlaqartut allat. Taamaammat atorfinnit tunuarnera tamatuminnga tunngaveqarsorinngivippara.

Jacob Abelsenip taamatut aalajangernera KNR-ip siulersuisuisa ajuusaarutigaat tusaatissatullu tigullugu.

- Jacob Abelsen siunissami angusaqarluarnissaanik KNR-ip siulersuisuisa kissaappaat, tunuarneranulli tunngasunik allanik oqaasissaqaratik, siulersuisuni siulittaasoq Nukaraq Eugenius taama oqarpoq.

Pisortaanerup tullersortaa Jan Berg KNR-imi pisortaanerugallassaaq pisortaanermik nutaamik atorfinitsisoqarnissaata tungaanut.