KNR-imi siulersuisut siulittaasuanik tunuartoqaqqittoq

KNR-ip siulersuisui qaammatit arfinillit ingerlanerinnaani aappassaanik siulittaasortaassapput.

Rosannguaq Rossen 2024-mi marsip 28-ani siulittaasunngortoq tunuarniarluni aalajangerpoq. Siulersuisut tusagassiuutinut nalunaarummi paasissutissiipput.

Taassuma KNR-imi siulersuisunut siulittaasutut suliassat piumasaqaatitaqangaatsiarnerat pissutigalugu siulittaasuuginnaraluaruni Kommuneqarfik Sermersuumi aaqqissuussinermut ineriartortitsinermullu pisortattut tutsuiginartumik suliaqaannarsinnaanngilaq.

- Atorfimmut pigama ilisimavara atorfik unammillernartoqassasoq, illup iluani avataanilu unammillernartunik naapitsiffiusartussaalluni.

- Massakkorpiaq KNR-ip siulersuisuini suliassat ima piumasaqaatitaqartigipput, suliffigisanni sulisutut tutsuiginassusera attatiinnassagukku, siulittaasuuinnassaguma

Attatiinnarsinnaanagu, taanna tusagassiuutinut nalunaarummi oqarpoq.

Taassumalu aalajangernini KNR-ip ajunnginnerpaamik siunissaqarnissaanik qulakkeeriniarnerunerarpaa.

Siulittaasup tullersortaa Miki Jensen naalakkersuisut nutaamik toqqaanissaata tungaanut siulittaasuugallassaaq.

Rosannguaq Rossenip siulittaasutut paarlataa Mette Steenholdt ukioq manna februaarip aallaqqaataani qaammatini 13-iinnarni siulittaasooreerluni tunuarpoq.

- Imminut KNR-imullu pitsaanerpaamik salliutitsinissaq nassuerutigaarput, siulittaasuujunnaartorlugu taamaaliorpoq. Allatut iliorsinnaanngilagut taamaalaat aalajangernera akueriinnartariaqarparput, Miki Jensen KNR-imut oqarpoq, nangillunilu:

- Kisianni nuanninngilaq. Uanga aamma aappassaanik siulittaasuugallarnissara naatsorsuutiginngikkaluarpara, kisianni suliaqaannassaagut.

Taassuma KNR-imi suliaqarneq piumasaqaatitaqangaatsiartoq piffissallu ilaani siulersuisuni suliaqangaatsiarnissaq nassuerutigaa, sulisulli suleqatigalugit iliuusissiorpugut, tamatumalu atulersinneqangajalernissaa naatsorsuutigaarput, Miki Jensen oqarpoq.

KNR-ip Rosannguaq Rossen oqaaseqartinniarsaraa.