Politikki

KNR-ip pisortaata sallinngortitsineq eqqarsarnartoqartikkaa

KNR-ip nutaamik illutaarnissaanut aningaasaliisoqareeraluartoq aningaasaliissutit illoqarfinni pingasuni umiarsualiviliornissanut atorneqartussanngortut Naalakkersuisut sapaatip akunnerata siuliani nalunaarutigaat, tamannalu KNR-imi pisortaqatigiinnit tupaallaatigineqarpoq.

Allattoq Karsten Sommer, Bikki P. Kleist, Ivik Kristiansen

decembarip 18-at 2017 16:06

KNR-illu illutaarnissaa kinguartinneqartariaqalerpoq, KNR-imilu pisortap Karl-Henrik Simonsenip pakatsissutigaa.

- Tulleriiaarinerit ataqqivakka. Kisianni uggoraara aningaasat uagutsinnut neriorsuutigineqareersut peerneqarneri. Soorunami taanna pakatsissutigeqaara, KNR-imi pisortaq Karl-Henrik Simonsen taama oqarpoq.

KNR-ip illut attartugai ukiumut 300.000-it koruuninik akitsoqqammerput, KNR-ilu illunut attartukkanut 3,4 milliuunit koruuninik akiliuteqartarluni.

AAMMA ATUARUK Umiarsualivittaassat KNR-ip illussaraluanit aningaasalikkat

KNR-illu illutaarnissaa kinguartinneqartussanngussaaq tamannalu sunniuteqanngitsoornavianngitsoq, Karl-Henrik Simonsenip oqaatigaa.

- TV-liorfiusinnaasumik raadiuliorfiusinnaasumillu illutaarnissarput sulisullu iluamik atugassaqartinnissaannut kinguarsaataavoq. Naatsorsuutigaara siusinnerpaamik aningaasanut 2018-imi inatsimmi suliarineqareerpat, tassa 2019-imi aallartinneqarnissaa, KNR-imi pisortaq Karl-Henrik Simonsen oqarpoq.

KNR-ip pisortaata sallinngortitsineq eqqarsarnartoqartikkaa

Aamma atuaruk