Umiarsualivittaassat KNR-ip illussaraluanit aningaasalikkat
Aningaasat 60 millionit koruunit ilaatigut KNR-ip illutaarnissaanik pilersaarummeersuusut, aningaasaqarnermut akileraartarnermullu ataatsimiititaliami siulittaasoq, Jens Immanuelsen KNR-imut oqarpoq.
- Aningaasat KNR-ip illutassaaniit aningaasaliissutit siusinnerusukkut immikkoortitat iluaniit aaneqarput, Jens Immanuelsen oqarpoq.
KNR-ip illorsuassaanut aningaasat atugassat minnerpaamik 43,8 millionit koruunit umiarsualiviliornissamut atorneqassasut, tusarniaanermi akissutip Kultureqarnermut Naalakkersuisoqarfimmeersup takutippaa. Illorsualiornissaq titartarneqareerlunilu pilersaarusiorneqareeraluarpoq. Illorsualiorniarnerli kinguarallarpoq.
AAMMA ATUARUK Pisortap umiarsualivissaq qilanaaraa
- Umiarsualiviliornissaq akuersissutigineqarmat KNR-ip pisariaqartinneqartumik illorsuassaanik sananissaq kinguartinneqarsinnaammat Naalakkersuisoqarfiup ajuusaarutigaa, Kultureqarnermut Naalakkersuisoqarfiup Attaveqaqatigiinnermut Naalakkersuisoqarfimmut allagaani nalunaarutigineqarpoq.
KNR-ip illorsuassaanik sanaartornissaq piviusunngunngitsoorsinnaasoq, atorfillit aammattaaq oqaatigaat.
Kangerlussuarmi takornariaqarnerulissasoq
Aningaasat umiarsuliviliornissamut atorneqarpata Kangerlussuami takornariaqarluarnerulernissaa Jens Immanuelsenip Naalakkersuisullu ilimagaat.
AAMMA ATUARUK Hermann Kangerlussuarmi umiarsualivissap aningaasaliiffigineqarnissaa pillugu: Soorunami Inatsisartut aalajangissavaat
- Kangerlussuarmi takornariarpassuit tikittartut amerlanerulersinnaanerat aqqutissiuusseqataasussaagami.
Namminersorlutik Oqartussat Kalaallit Nunaanni Umiarsualivinnut Immikkoortumut pilersaarutaanni 2015-2025-moortumi tamanna akerlilerneqarpoq. Kangerlussuarmi nutaamik umiarsualiviliornissamut allilerinisamulluunniit Kangerlussuup atuinnarneqarnissaa apeqqutaasoq.
AAMMA ATUARUK Kangerlussuarmi umiarsualivik inerisarneqartariaqarpoq
Mittarfissat nutaat pingasut 2022-mi naammassineqarnissaat naatsorsuutigineqarpoq.
Takornariat amerlasuut taamanikkussamut Kangerlussuakkooratik timmisartortassapput, taamaalilluni nunaqarfiup nunatsinnut attaveqaqatigiinnermut uummaarissumik atuuffini annaassallugu.
