Kangerlussuarmi umiarsualivik inerisarneqartariaqarpoq
Kalaallit Danmarkimi ilinniagaqartut peqatigiiffiata, Avalaap Nunatsinnilu ilinniagaqartut peqatigiiffiata, ILI ILI-p ataatsimoorlutik Danmarkimi isumasioqatigiissitsineranni, taaguutilimmi 'Kalaallit Nunaat 2015'-mi Kangerlussuarmi periarfissat arlaqartut saqqummiussuunneqarput.
Tamanna sioqqullugu Air Icelandip Keflavikimiit Kangerlussuarmut timmisartuussisalernissani 2016-miit pisalissasoq nalunaarutigaa aamma aatsitassarsiorfissuup, Hudson Resourcesip aatsitassanik Kangerlussuup timaani nunamit qalluilernissartik pillugu qinnuteqaateqarlutik nalunaarutigalugu.
Tamakkulu saniatigut Kangerlussuarmi biilinik misileraavissaq pillugu isumaasioqatigiinnissaq, Nunatsinni Inuussutissarsiornermut Suliffeqarnermullu Naalakkersuisoqarfimmit isumaqatigineqarlunim oqaatigineqarpoq. Aammattaaq sermersuarmi unnuisarfissanik sanaartornissamik pilersaaruteqartoqarnera Qeqqata Kommuniani kommunalbestyrelsemit akuerineqarpoq.
Aqquserngup pilersinneqarnissaa akuersissutaareerpoq
Sisimiut Kangerlussuullu akornanni aqqusinissamik pilersaaruteqarnermi nunat allamiut Nunatsinnilumi innuttaasut uumasunik piniarnermi tammajuitsussarsiniartarnissaat kommunalbestyrelsep inaarutaasumik akuereqqammerpaattaaq.
Tamakku tassa saniatigut Kangerlussuarmi umiarsualiviup pitsanngorsarneqarnissaa kisinngoruppoq, taamaaliornermi takornarissat amerlanerit ajiornannginnerusumik tikittalernissaat kissaatigineqarluni. Tassalu tamanna pillugu Qeqqata Kommuniani borgmesteri, Hermann Berthelsen Inatsisartunut kaammattuivoq tamassuma siunnersuutigineqarnissaanik. Soorlu borgmesteri oqartoq, aningaasartuutaarujussuanngitsoq pitsaasumilli kinguneqartussaq.
