Henrik Sandgreenip taamatullu KNAPK-p saassussinera KNR-ip akissuteqarfigaa
Asasarput Henrik Sandgreen.
Radioaviisimi sulisut ilaat atiatigut taallugu qanittukkut sakkortuumik uparuarpat. Tamanna Facebookimi qupperninni pivoq, KNAPK-llu siulittaasuatut atsioravit tamanna pisortatigoortutut nalilerneqartariaalluni. Allaaserisat tupigusuutigalugu atuarparput, unnerluutiginnillutillu saassussigavit.
Sulisorput marloriarlutit taavat, mikrofonimillu tigumiartuuneralugu salluliornerarlugulu. Aammattaaq teknikeriunerarpat, naak ilisimasariaqaraluarlugu tusagassiortutut sulimmat taamatullu ukiorpassuarni suliaqarluni. Tamakkua inuttarsiuilluni sakkortuumik saassussinerupput, KNR-imut minnerunngitsumillu sulisutsinnut nikassaannerulluni. Sakkortuumik erseqqissaatigissavarput taamatut oqariartuuteqarnerit akuersaarneqarsinnaanngilluinnartutut isigigatsigu.
Naammagittaalliuutigisavit tatiginassusianut tunngatillugu, illit NUSUKA-llu saaffiginnissutigisarsi suliaralugulu akissuteqarfigereerparput. Naqqitassaqarata suli aalajangiusimavarput. KNAPK-p siulittaasua Greenland Pelagic A/S-imik isornartorsiuippat, taava isornartorsiuineq taanna piginnittut isummerfigisassarivaat. Tamannalu pivoq, aammalu pissusissamisoorluinnarluni.
Aamma allapputit KNAPK naalakkersuisoqarfimmi savalimmiormiut aamma islandermiut saassussisimanerminut utoqqatsersimanerarlugu, sulisorput pineqartorlu taamatullu Radioaviisi siornatigut sallulioreersimasut. Allapputit tamanna utoqqatsernerunani ajuusaarluni oqarnerusoq.
Tamatumunnga tunngatillugu siullertut erseqqissaatigissavara sulisorput pineqartumut tamanna pillugu allaaserisaqarsimanngimmat. Aappaattullu aamma KNR allassimanngilaq KNAPK utoqqatsersimasoq. Allaaserisaq qulequtaqarpoq; Atorfilittat nunaqqatiminnik salliutitsisarnerannik unnerluutiginninnini KNAPK-p ajuusaarutigaa
Allaasserisamili pisortaq ima issuarneqarsimavoq; "Aalisarnermut naalakkersuisoqarfimmi pisortap Jørgen Isak Olsenip Sermitsiamut uppernarsarpaa KNAPK-p utoqqatsernera akuerisimallugu."
Taamaammat sallutuujuneraallutit unnerluutiginninnitit tunngavissaqanngitsutut nalilerparput, Radioaviisimili sulisumik mamarliisutut oqaatigisariaqarlutit. KNAPK-milu siulittaasuunerit tunuliaqutaralugu taamaaliorputit. Tamannalu kukkunertut angisuutut isigaarput.
Naggasiullugu oqaatigissavarput KNR pillugu maalaaruteqarusussaguit qaqugumulluunniit attavigisinnaagatsigut.
Inussiarnersumik inuulluaqqusillunga
Jacob Abelsen
KNR-imi pisortaq
