Tusagassiuutinut nalunaarut: KNR-ip siunissamut ineriartornera iliuuseqarusunnerlu
KNR-imi siulersuisuisa unammillernartut Tusagassiuinermi Sulisut Peqatigiiffiannit saqqummiunneqartut eqqumaffigaat, aamma KNR-imi sulisut sulinermi avatangiisinut sulisussarsiornermullu tunngatillugu unammillernartut.
Erseqqissaassutigerusupparput siulersuisut ajornartorsiutaasunik tamakkuninnga aaqqiissuteqarnissamut iliuuseqarusussuseqarmata, siulersuisullu pisortaq ataavartumik attaveqarfigaat, assigiinngitsunik piumasaqaateqarfigineqarlunilu naatsorsuuteqarfigineqarmat.
Annga Lyngep aqutsinerani KNR-imi sulisut 15-t ilinniartullu marluk maajip naanera ilanngullugu taarserneqarput. Piffissami tassani sulisut atugarissaarnerulernissannut suliniutit arlallit aallartinneqarput. Tamatuma saniatigut piffissami 2024-miit 2027-mut iliuusissatut pilersaarutip periusissiallu nutaap atuutilersinneqarnissaa pillugu attaveqatigiinneq ataavartumik pivoq.
Iliuusissatut pilersaarummi qaammatip tulliani saqqummiunneqartussami anguniarneqassaaq KNR-ip nutarternissaa, ullumikkut tusagassiuutinut piumasaqaatinut naapertuuttumik, piujuartitsinerusumillu aaqqiissuteqarnissaq suliniutigineqarluni ilaatigut tusagassiortunik nutaanik piginnaanilinnik ineriartortinissaq siunertaralugu.
Pisortat aqutsisullu aamma ammanerusumik aqutsinissartik ersarissuunissartillu sulisut kissaatigisaattut sulissutigissavaat, taamatullu aamma suliffeqarfiup iluani avataanilu attaveqaqatigiinnerup pitsanngorsaatissaannik suliaqarluni.
Sermitsiami allaaserisami politikerit erseqqissarpaat KNR politikkikkullu tunuliaqutaasut akunnerminni suleqatigiinnerusariaqarnerat pisariaqartoq. KNR-ip siulersuisuisa arlaleriartumik tamanna oqariartuutigisarpaat. Taamaattumik KNR-imi siulersuisut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq attaveqarfiginiarpaat KNR-ip periusissiaa qanittukkut akuerineqartoq saqqummiunniarlugu, suliniutinimmi anguniagassanillu periusissiamiittunik iluatsittumik piviusunngortitsiniarnermi, politikkerit KNR-ip ingerlanneqarneranut sinaakkutinik pitsanngorsaanissamut iliuuseqarusussusaat aalajangiisuummat.
Minnerunngitsumik aamma kissaatigaarput tusagassiiviup pitsaanerusunik atugassarititaqalernissaa, tamannalu sivisuumik anguniagarisimavarput, sulili piviusunngortinneqanngilaq. Ajoraluartumik oqaatigisariaqarparput KNR-ip atugassarititaanut soqutiginninneq amigaataasoq, tusagassiivinnullu politikkimik amigaateqarneq pissutigalugu nalaatsornerinnakkut soqutiginnittoqartartoq.
Periusississiami qitiutillugulu suliniutissanut ilaavoq KNR-ip ineriartorteqqinnerani KNR tassaassasoq inuiaqatigiinnit tamatigoortumik tarrarsorfiussasoq nutaarsiassanut, paasissutissiissutinut, kulturimut timersornermullu tunngasunik katersuuffiulluni. Kiffartuussinernik paasissutissiissutaasinnaasunik, soqutiginartunik, tutsuiginartunik, arlaannaannulluunniit attuumassuteqanngitsunik, digitaliusunik – sukkasuumillu tunniusserusuppugut.
Tamanna anguniagaq anguneqassappat politikerit miserratiginagu paasisariaqarpaat, KNR inuiaqatigiinni pingaarutilittut inissisimasuummat, tamallu oqartussaaqataanerannik pingaarutilimmik tungaviliisuummat.
KNR-imi siulersuisut ineriartornerup tamatuma ingerlateqqinnissaa aalajangiusimavaat, KNR-illu siunissaanut takorluukkat piviusunngortinniarlugit sulisut, suleqatit soqutigisaqaqatigiillu qanimut suleqatiginissaat qilanaaraarput.
Siulersuisut sinnerlugit,
Rosannguaq Rossen, KNR-ip siulersuisuini siulittaasoq
