Eqqaaniut: Elna Egede, nunatta tusagassiortua sapiitsoq, toquvoq
Nunatsinni tusagassiortut sapiilluinnartut tunniusimasullu ilaat, Elna Egede, toqusoq nalunaarfigineqaratta aliasuutigeqaarput.
Elna 70-inik ukioqarluni toquvoq.
Elna Egedep piumassuseqarluni tunniutiinnajuitsuunini nipinilu nunatsinni ilisimaneqaatigai.
Elna Narsami inunngorpoq meeraanerminilu inuttut annaasaqaqaaq. Elna tallimaannarnik ukioqartoq angutaa toquvoq, kingornalu arnaa, taamaattumillu qatanngutini nukarliit akisussaafigilerlugit. Inuttut aqqusaakkani pissutigalugit isumaginninnermut tunngasunik pimoorusseqaluni apeqqusiisarpoq.
Elna Egede KNR-imi atuaasutut aallartippoq kingornalu tusagassiortutut ilinniagaqalerluni. Taanna ilaatigut AG-mi, KNR-imi Nuuk TV-milu sulisimavoq. Tusagassioriaatsip silarsuani uteriitsuunini paasiniaalluartarninilu nuna tamakkerlugu nalunnginneqaatigilerpai, pingaartumik politikerit nuimasut ilaasa Nuummi peqquserluttuliornerannik 2007-mi saqqummiussinini ilisimaneqaatigalugu. Taassuma sapiitsuliornini pissutigalugu suliffini annaavaa, inuiatigiinnili pissutsit malunnaatilimmik allanngortillugit.
Elna Egede TP-mit (Tusagassiuinermik Sulisut Peqatigiiffiat) nersornaaserneqarpoq aamma ´innuttaasut qullersaannut isornartorsiuisimanera´ pillugu Dansk Journalistforbundip Fagligt Forumiani Københavnimi 2008-mi legatinnalluni nersornaaserneqarpoq. Taakku nersornaatit Elna Egedep ilumoortumik aamma naapertuilluarnermik ersersitsiniarluni malartitassaanani pimoorussilluni sulisarneranut uppernarsaataapput.
Elna Egedep inuunini tamaat inuiaqatigiinni sanngiinnerpaat sorsuutigai, nunarpullu siuariartussaguni ajornartorsiutinik takunnissinnaasariaqartoq upperalugu. Taassuma pimoorussisarnini, erseqqissuliortarnini isornartorsiuisinnaassuseqarninilu suleqatiminit, ikinngutiminit ilaquttaminillu nuannarineqaatigalugillu ataqqineqaatigai.
Elna Egede arnaavoq uummatigissoq, inuk nakimaalluni ilumoortumik naapertuilluarnermillu ersersitsiniarluni tunuarsimaanngisaannartoq. Tamatta maqaasissaqaarput. Elna Egedep eqqaaneqarnera ataqqinartuuli.
Inussiarnersumik inuulluaqqusilluta,
KNR-ip siulersuisui
